SPAK ka përfunduar hetimet ndaj ish-presidentit Ilir Meta, ish-bashkëshortes së tij Monika Kryemadhi, nënës së saj Pirro Xhixho dhe Ema Çokun, duke zbuluar skema të shumta korruptive dhe abuzime me pushtetin. Hetimi ka identifikuar disa akuza të rënda, përfshirë “Korrupsionin pasiv të funksionarëve të lartë shtetërorë”, “Pastrim të produkteve të veprës penale” dhe “Mosdeklarimin e pasurive”.
Ilir Meta akuzohet për tre raste korrupsioni, duke përfshirë bashkëpunimin me Kryemadhin në veprimtari korruptive dhe pastrim parash. Monika Kryemadhi po ashtu përballet me akuza të ngjashme dhe është e dyshuar për fshehjen e pasurive dhe shpenzimeve. Në të njëjtin drejtim, Pirro Xhixho dhe Ema Çoku janë akuzuar për korrupsion dhe pastrim parash.
Ky proces penal është rezultat i një hetimi të gjerë që filloi në 2019 dhe u shtrua pas kallëzimeve të ndryshme. Në vitin 2024, të gjitha procedimet u bashkuan në një të vetëm. Hetimet kanë zgjatur për shkak të evidencave të shumta që përfshijnë përdorimin e influencës politike për të favorizuar biznese të caktuara dhe përfitimin e shpërblimeve të paligjshme.
SPAK ka dokumentuar raste ku Ilir Meta si Minister ka ushtruar ndikim në kontrata me kompaninë “Debt International Advisory”, duke i lejuar asaj të menaxhojë borxhe të CEZ-it pa përmbushur kriteret ligjore. Kjo kompani ka përfituar më shumë se 649 milion lekë përmes një marrëveshjeje të paligjshme.
Po ashtu, Meta dhe Kryemadhi akuzohen për ndikim në fushën e telekomunikacioneve, me përfitim financiar nga kontratat e lidhura me kompani private. Ndërkohë, janë zbuluar lidhje korruptive të çiftit me biznesmenë, ku kanë përfituar prona dhe favore të tjera përmes ndikimeve të paligjshme.
SPAK po ashtu ka gjetur se ndër shpenzimet e tyre, I. M. dhe M. K. nuk kanë deklaruar shpenzime të konsiderueshme mjekësore dhe pasuri, duke shkelur ligjet që rregullojnë deklarimin e pasurive nga funksionarët publikë. Hetimet vazhdojnë për të zbardhur në detaje veprimtarinë e akuzuar, që lidhet me korrupsionin dhe abuzimin e pushtetit.
