Gjashtë shtetas shqiptarë, anëtarë të një grupi të organizuar kriminal, janë dënuar me gjithsej mbi 28 vite burg nga Gjykata e Lartë e Swindon, pas një hetimi të thelluar mbi shpërndarjen e kokainës në këtë qytet. Hetimi, i udhëhequr nga Njësia për Krimin e Rëndë dhe të Organizuar në Wiltshire, zgjati gjashtë muaj dhe çoi në identifikimin e banesave e automjeteve përdorur për fshehjen e drogës, si dhe të organizatorëve të këtij rrjeti.
Në qendër të operacionit qëndronte 32-vjeçari Saimir Neziraj, i njohur si udhëheqësi i grupit të shpërndarjes së drogës, i quajtur “Denzel”. Ai kishte përgjegjësi për blerjen e kokainës, mbledhjen e parave dhe furnizimin me drogë. Edmir Beqiri ishte ai që ruante kokainën në Swindon, ndërsa Ardian Gjeta dhe Jorgo Brachousai ishin përgjegjës për shpërndarjen e saj në rrugë. Hetimi përfshinte gjithashtu aktivitetet e Nezirajt në Londër, ku u vërejt teksa merrte drogë nga Ergys Abdyli, një tjetër anëtar i grupit.
Një moment i rëndësishëm ndodhi në mars të vitit 2024, kur policia vëzhgoi një takim mes Nertil Halilit dhe Nezirajt. Kjo çoi në një seri bastisjesh të koordinuara në Swindon, Derby dhe Londrën veriore, ku u sekuestruan sasi të mëdha kokaine dhe para të gatshme, ndërsa dyshuarit u arrestuan. Të gjithë të arrestuarit pranuan fajësinë për veprat penale të trafikut të drogës.
Dënimet e dhëna nga gjykata janë si më poshtë: Neziraj mori 8 vite burg, Halili 7 vite e 10 muaj, Beqiri 3 vite e 8 muaj, Abdyli 5 vite e 11 muaj, Gjeta 2 vite e 1 muaj, dhe Brachousai 16 muaj burg me kusht për dy vjet. Kjo rast tregon për përpjekjet e policisë për të goditur grupe të tilla kriminale në mbrojtje të shoqërisë dhe sigurisë publike.
