Startup-i i inteligjencës artificiale i Elon Musk, xAI, ka ngritur një padi kundër Apple dhe OpenAI, duke i akuzuar për praktikë antikonkurruese dhe një “konspiracion” për të monopolizuar tregun e smartphone-ve dhe chatbot-eve gjenerues. Padia është depozituar në një gjykatë në Teksas dhe sfidon marrëveshjen mes Apple dhe OpenAI që ka rezultuar në integrimin e teknologjisë ChatGPT në sistemet operative të Apple. Musk pretendon se kjo marrëveshje ka “bllokuar tregjet”, duke e bërë të pamundur për kompanitë si xAI, që ofron chatbot-in Grok, të ndjekin një konkurrencë të ndershme.
Musk e përshkruan këtë marrëveshje si një “marreveshje të paligjshme” dhe një përpjekje për të shfrytëzuar dominimin monopol të Apple, në mënyrë që OpenAI të ruajë monopolin e saj në chatbot-et gjenerues. Ai kërkon “shumë miliarda dollarë” si dëmshpërblim. Megjithatë, OpenAI e ka hedhur poshtë padinë e Musk, duke e cilësuar si një “model të vazhdueshëm ngacmimesh” nga ana e tij. Nga ana tjetër, Apple nuk ka dhënë ende asnjë koment mbi këtë çështje.
Ky konflikt shënon vazhdimin e tensioneve mes Musk dhe CEO-së së OpenAI, Sam Altman. Të dy ata ishin bashkëthemelues të OpenAI në vitin 2015, por pas ndarjes së tyre në vitin 2018, Musk ka ngritur disa padi kundër kompanisë, duke e akuzuar atë për shndërrimin në një sipërmarrje me qëllim fitimi. Ndërsa OpenAI kishte shprehur shqetësim për marrëdhënien e keqe me Musk, duke thënë se ishin të trishtuar për situatën, pasi ishin ndjerë të frymëzuar nga ai në fillim.
Aktualisht, OpenAI po përpiqet të arrijë një vlerësim prej 500 miliardë dollarësh, që do ta bënte atë kompaninë më të vlefshme private në botë, duke lënë pas SpaceX të Musk, e cila është e vlerësuar në 350 miliardë dollarë. Kjo situatë shpreh tensionet në rritje dhe konkurrencën në fushën e inteligjencës artificiale midis këtyre gjigantëve teknologjikë.
