Një studim i ri ka zbuluar se ekspozimi i përsëritur ndaj valëve të të nxehtit përshpejton procesin e plakjes te njerëzit, me pasoja të ngjashme me ato që shkaktojnë pirja e duhanit, konsumimi i alkoolit, dieta e dobët dhe mungesa e aktivitetit fizik. Shkencëtarët nënvizojnë se temperaturat ekstreme, të cilat bëhen gjithnjë e më të zakonshme për shkak të krizës klimatike, mund të dëmtojnë shëndetin afatgjatë të miliarda njerëzve në mbarë botën.
Studiuesit, në një hulumtim që përfshiu 25,000 persona në Tajvan për 15 vite, shqyrtuan lidhjen midis ekspozimit ndaj valëve të të nxehtit dhe moshës biologjike, një tregues i shëndetit të përgjithshëm. Rezultatet treguan se ata që përjetonin më shumë se katër ditë me temperatura ekstreme brenda një periudhe dyvjeçare kishin një rritje të moshës biologjike prej rreth 9 ditësh. Punëtorët që kalonin kohë të gjatë jashtë sobanë një rritje edhe më të madhe prej 33 ditësh.
Deri më tani, ishte e njohur se valët e të nxehtit shkaktojnë rritje të menjëhershme të vdekjeve, siç është rasti me rreth 600 vdekje të lidhura me një valë të nxehti në Angli, por ky është një nga studimet e para që shqyrton pasojat afatgjata. Dr. Cui Guo nga Universiteti i Hong Kongut tha se ndjeshmëria ndaj valëve të të nxehtit mund të ketë pasoja më të rënda nga sa është raportuar.
Profesor Paul Beggs nga Universiteti Macquarie në Australi theksoi se ky studim nxjerr në pah se valët e nxehta ndikonin në procesin e plakjes trupore. Ai përmendi edhe një zbulim nga viti 2024 që sugjeron se ekspozimi ndaj të nxehtit në fëmijëri dëmton zhvillimin e trurit, duke treguar kështu se ndikimi i nxehtësisë ekstreme është i dëmshëm për të gjitha moshat.
Ky studim, i publikuar në revistën “Nature Climate Change”, mat ndikimin e nxehtësisë në shëndet përmes analizave të ndryshme mjekësore si tensioni i gjakut dhe nivelet e kolesterolit. Përfundimisht, valët e të nxehtit përbëjnë një rrezik të heshtur për shëndetin tonë, duke shkaktuar plakje të padukshme dhe të vazhdueshme.
