TIRANË- Kreu i Partisë së Lirisë, Ilir Meta ka ankimuar në Apelin e Posaçëm vendimin e GJKKO që i refuzoi kërkesën për lirimin nga burgu. Më 22 gusht, GJKKO vendosi moszëvendësimin e masës së sigurisë me arsyetimin se rreziku që Meta të ndikojnë në prova dhe tek dëshmitarët është i lartë.
Më tej thuhej se pushteti dhe lidhjet që Meta ka krijuar për shkak të funksioneve që ka aktualisht apo ka pasur më parë, krijojnë mundësi praktike për të ndikuar tek dëshmitarët dhe për të ‘helmuar’ provat”. GJKKO shton se pozita e Metës është rënduar pas zyrtarizimit të akuzave dhe përfundimit të hetimeve. Për këto arsye, masa “arrest në burg” konsiderohet ende e domosdoshme dhe proporcionale.
Ilir Meta u arrestua më 21 tetor 2024. Ai dhe deputetja Kryemadhi dyshohen se, duke bashkëpunuar mes tyre dhe me funskionarë të tjerë shtetërorë, në disa episode duke nisur nga 15 vite më parë kanë shfrytëzuar postet e tyre shtetërore dhe politike për të favorizuar kompani private, si dhe në veprimtari të tjera me lobime në SHBA dhe shitblerje banesash në këmbim të përfitimit të shumave të konsiderueshme parash, të cilat janë përpjekur t’i fshehin, duke mos i deklaruar në ILDKPI dhe KQZ.
