Një studim i ri nga një grup kërkuesish amerikanë sugjeron se aminoacidi cisteinë luan një rol kyç në humbjen e peshës, duke ndikuar në metabolizmin e trupit. Ekspertët kanë shqyrtuar mënyrat si ulja e marrjes së kalorive çon shpesh në humbje peshe, duke sugjeruar se një nga faktorët kryesorë mund të jetë cisteina, e cila është e pranishme në shumë ushqime proteinike.
Gjetjet e studimit tregojnë se kufizimi i cisteinës ndihmon në shndërrimin e yndyrës së bardhë, e cila ruhet në trup, në yndyrë kafe, e cila konsumon energji dhe krijon nxehtësi. Christian Stadler, inxhinier biomjekësor në Qendrën e Kërkimeve Biomjekësore Pennington, thekson se këto rezultate ofrojnë mundësi për strategji të reja për menaxhimin e peshës që nuk çdoherë varen nga reduktimi i kalorive.
Për të vërtetuar hipotezën, studiuesit eksperimentuan me minj të modifikuar gjenetikisht që nuk ishin në gjendje të prodhonin cisteinë. Rezultatet treguan se minjtë që nuk e merrnin këtë aminoacid shënuan një humbje prej 25-30% të peshës trupore brenda një javë, ndryshe nga ato që vazhduan ta produkonin. Të dhënat nga 238 njerëz që morën pjesë në një program kufizimi të kalorive gjithashtu zbuluan se nivelet e cisteinës në indet e tyre dhjamor ishin ulur, duke forcuar lidhjen mes aminoacidit dhe humbjes së peshës.
Megjithatë, hulumtimi vjen me paralajmërime. Bllokimi i cisteinës te minjtë çoi në një humbje peshe të shpejtë dhe potencialisht të rrezikshme. Ky efekt u përmbys kur nivelet e këtij aminoacidi u rivendosën, pasi cisteina është e rëndësishme për funksionet biologjike dhe ekuilibrin redoks të trupit. Ekspertët theksojnë kompleksitetin e trupit të njeriut dhe se ndërhyrjet në metabolizëm mund të kenë pasoja të shumëllojta.
Ky studim hap mundësi të reja për kuptimin e metabolizmit dhe menaxhimin e peshës, por kërkon gjithashtu kujdes për të kuptuar pasojat e çdo ndërhyrjeje.
