SHBA- Zëvendëspresidenti i Shteteve të Bashkuara, J.D. Vance se fundmi ka zhvilluar një intervistë ndërsa ka folur edhe në lidhje me bisedimet për paqe në Ukrainë mes presidentit Trump dhe homologut te tij Putin. Vance në një intervsitë për emisionin “Meet the Press” në NBC u shpreh se Rusia ka bërë lëshime të rëndësishme për një marrëveshjeje të mundshme për t’i dhënë fund luftës në Ukrainë.
Ai më tej u shpreh se pret përparim në të ardhmen teksa theksoi se presidenti Donald Trump ka bërë veprime të mëdha diplomatike për ti dhënë fund kësaj lufte e cila nuk është në interes të asnjërës palë, as Evropës dhe as SHBA-së. Vance shtoi se do të këmbëngulin për të arritur një zgjidhje diplomatike.
“Mendoj se rusët kanë bërë lëshime të mëdha ndaj Presidentit Trump, për herë të parë në tre vjet e gjysmë që nga fillimi i konfliktit. Ata kanë deklaruar se nuk do të përpiqen të vendosin një regjim kukull në Kiev – që ishte një ndër kërkesat kryesore në fillim. Dhe më e rëndësishmja, ata kanë pranuar që të ketë një lloj garancie sigurie për integritetin territorial të Ukrainës,” tha ai.
Sipas tij vendosja e sanksioneve të reja ndaj Rusisë do të shqyrtohet rast pas rasti, duke pranuar se masa të tilla nuk do të jenë efektive për ta detyruar Moskën të pranojë një armëpushim.
