DURRËS- Pamje nga momenti kur policia rrethon dy “skifterët” të cilët vjedhjen e kthyen në skenë filmi aksion janë publikuar. Mësohet se pas vjedhjes 28-vjeçari,Ardit Domi dhe 27-vjeçari Lorenc Çali kanë vjedhur një automjet në Durrës dhe e kanë përdorur për të vjedhur me dhunë një karburant në Sukth.
Dy autorët janë identifikuar nga policia dhe gjatë ndjekjes, makina e të rinjve ka dalë nga rruga. Gjatë kësaj kohe ata kanë hapur zjarr ndaj efektivëve. Si pasojë e shkëmbimit të zjarrit, Domi ka mbetur i plagosur ndërsa, Çali është vënë në pranga.
Nga pamjet shihen forca të shumta policie të cilat kanë rrethuar të rinjtë pranë një lokali ku po organizohej një dasmë. Për më shumë se 20 minuta, edhe pse të rrethuar, refuzuan të dorëzoheshin, derisa polica ndërhyri dhe transportoi Domin në spital ndërsa Çali u vu në pranga.
28-vjeçari ndodhet në Spitalin e Traumës Tiranë, nën kujdesin e mjekëve, jashtë rrezikut për jetën. Ndërkohë në vendin e ngjarjes u gjet një armë zjarri automatik me 2 krehra, e përdorur nga dy personat e sipërpërmendur.
