Një ngjarje tragjike ka tronditur opinionin publik në Greqi, ku një 40-vjeçar shqiptar ka vrarë bashkëshorten e tij 36-vjeçare në prani të fëmijëve të tyre në Volos. Ai u paraqit në gjykatë këtë të diel dhe gjatë seancës nuk ka treguar pendesë, duke qëndruar i heshtur me kokën ulur. Sipas raportimeve, ai ka folur me vajzën e tij 18-vjeçare, duke i thënë: “Isha i hutuar, nuk doja ta bëja.”
Prokuroria greke ka ngritur akuza për vrasje me dashje dhe ka urdhëruar një hetim social për të përcaktuar kujdestarinë e fëmijëve të mitur, të cilët aktualisht janë nën kujdesin e të afërmve të nënës. Autoritetet po ashtu do të hetojnë një shtrim të mëparshëm të autorit në spital psikiatrik në qershor, për të kuptuar më mirë rrethanat e veprimeve të tij.
Pas ngjarjes, autori iku dhe u fsheh për më shumë se 24 orë, derisa u kap nga policia në një bar të braktisur, rreth 200 metra larg shtëpisë së tij. Ai kishte ndërruar rrobat, të cilat dyshohet se i kishte gjetur në kazanët e mbeturinave, dhe nuk kishte me vete as telefonin dhe as armën e krimit. Gjatë arrestimit, ai u shpreh se bashkëshortja e tij po e tradhtonte dhe se e kishte vrarë pasi “e meritonte”. Megjithatë, autoritetet theksojnë se çifti nuk kishte histori të raportuar të dhunës në familje, pavarësisht se 40-vjeçari kishte pasur kontakte të mëparshme me policinë.
Autopsia e viktimës pritet të kryhet nesër nga Departamenti i Mjekësisë Ligjore në Selanik, ku është transportuar trupi i saj. Rasti ka shkaktuar shqetësim dhe diskutime të shumta në shoqërinë greke, duke e theksuar rëndësinë e trajtimit të problemeve të dhunës në familje dhe shëndetit mendor.
