Buja e “rilindjes ushtarake” që po propagandohet nga qeveria shqiptare është në fakt një skemë e pastër pasurimi për një grusht trafikantësh dhe klientësh politikë, ku figura më e zëshme dhe më e rrezikshme është Emiljano Dusha. Ky emër nuk është i panjohur për publikun shqiptar, pasi prej vitesh është lidhur me tenderat e Ministrisë së Brendshme, është denoncuar për blerje votash në emër të maxhorancës dhe është përfshirë në skandale që flasin hapur për lidhjet e tij me botën e krimit. Sot ai shfaqet si “biznesmeni i madh i armëve” duke kontrolluar në prapaskenë industrinë ushtarake shqiptare dhe duke vendosur duart mbi miliarda lekë fonde publike.
Tre kompani të reja, TIMAK DEFENCE, M.K.D dhe GUNA TACTICAL, janë ngritur vetëm brenda tre ditëve të gushtit 2025 me shoqërinë shtetërore KAYO sh.a. si ombrellë. Dy prej tyre kontrollohen drejtpërdrejt nga Dusha përmes MSSC-së së tij, çka e bën atë një lojtar dominues në këtë treg strategjik. KAYO sh.a., e ngritur mbi rrënojat e uzinave ushtarake Gramsh, Poliçan dhe Mjekës, drejtohet nga ish-drejtori famëkeq i Policisë së Shtetit, Ardi Veliu, dhe ka një kapital fillestar prej 150 milionë lekësh. Pra, kemi një ndërthurje perfekte: një trafikant i ricikluar si biznesmen dhe një ish-polic i lidhur ngushtë me pushtetin që kontrollojnë së bashku projektin më delikat të shtetit shqiptar, prodhimin e armëve dhe municioneve.
Skema është e qartë dhe e rrezikshme. Emiljano Dusha, një personazh i njohur për lidhjet e tij me blerjen e votave, dhunën dhe tenderat e pista, futet sot në zemër të industrisë së mbrojtjes me bekimin e qeverisë dhe me modelin e importuar nga Turqia, ku oligarkët e afërt me pushtetin kontrollojnë armët dhe logjistikën ushtarake. Kjo nuk është zhvillim i industrisë, por kapje e saj nga një individ që ka kaluar nga trafiku te tenderat dhe tani te armët. Një trafikant që deri dje i shërbente partisë për vota, sot shpallet partner i shtetit për të furnizuar ushtrinë dhe policinë me municione e uniforma.
Kjo është fytyra e vërtetë e Emiljano Dushes. Një njeri që e ka nisur karrierën duke dhunuar gazetarë dhe duke mbledhur vota me para të pista, sot pasurohet duke futur duart në fondet publike dhe duke kontrolluar sektorë strategjikë të shtetit. Është e qartë se ky projekt nuk është gjë tjetër veçse një portofol i ri tenderash ku gara është farsë dhe fituesi është i paracaktuar. Aksioneri i garantuar është gjithmonë Dusha, trafikanti i vjetër i kthyer në oligark të armëve.
Por Emiljano Dusha e ka një problem që nuk mund ta shmangë. SPAK po e ndjek hap pas hapi dhe dosjet për aktivitetin e tij kriminal janë në tavolinë. Sa më shumë ngjitet lart, aq më i fortë do të jetë rrëzimi. Dhe Emiljano Dusha e di fare mirë se ky pasurim mbi kurrizin e shtetit nuk do të zgjasë shumë. Arrestimi i tij nuk është më çështje nëse, por vetëm kur.
Kush eshte Emiljano Dusha ?
Dusha është një biznesmen i përfolur për lidhje të ngushta me segmente të caktuara të së majtës, raporte që nisin prej fundit të viteve ’90 ku ai fillimisht shfaqet si shitës celularësh, por më pas del në pah duke marrë tenderë miliardësh nga maxhoranca aktuale. Dusha është akuzuar nga Mero Baze për rrahjen e tij në vitin 2005, kur bashkë me Astrit Patozin kishin shkuar për të vëzhguar zgjedhjet e përgjithshme në jug të vendit. Baze tha atëhere se ishte rrahur nga bandat e vitit 1997.
Dusha do të rishfaqet në skenë disa vite më vonë kur Belind Këlliçi bën një padi në SPAK për blerje votash, ku emri i tij atashohet me një grup të konsideruar të rrezikshëm nga opozita që grumbullonte kartat e identitetit të banorëve të Tiranës dhe i blinte ose bënte presion me qëllim votimin e PS. Padia u tërhoq për arsye të panjohura. Ai rezulton edhe personi që ka ofruar një sasi të madhe gazi lotsjellës për Ministrinë e Brendshme me qëllim shtypjen e protestave të vitit 2020.
