Presidenti i kaluar amerikan, Donald Trump, ka kritikuar ashpër aktualin president Joe Biden për mënyrën se si po menaxhon situatën në Ukrainë në luftën përballë Rusisë. Në një postim në rrjetet sociale, Trump ka bërë një krahasim mes Ukrainës dhe një “ekipi të shkëlqyer sportiv me një mbrojtje fantastike” që nuk lejohet të hyjë në sulm, duke theksuar se kjo strategji e ndalon Ukrainën të fitojë në luftë.
Trump ka deklaruar se mënyra e vetëm mbrojtës e Biden-it ka sjellë dështime, duke theksuar se është “shumë e vështirë, nëse jo e pamundur”, për një vend në luftë të fitojë pa sulmuar vendin pushtues. Ai ka kritikuar Bidenin si “të korruptuar dhe thellësisht të paaftë”, duke sugjeruar se vendimi i tij për të kufizuar veprimet ushtarake të Ukrainës ka rezultuar në një situatë të paqëndrueshme dhe të pafavorshme për popullin ukrainas.
Sipas Trumpit, nëse ai do të kishte qenë president, lufta në Ukrainë nuk do të kishte ndodhur kurrë, duke sugjeruar se ai do të kishte pasur strategji më efikase për të parandaluar konfliktin. Ai ka shprehur besimin se me qeverisjen e tij do të kishte pasur “shans zero” për një luftë të tillë.
Kritikat e Trumpit vijnë në një kohë kur situata në Ukrainë vazhdon të jetë e tensionuar, dhe shumë analistë po diskutojnë mbi strategjitë e duhura për të përballuar agresionin rus. Ish-presidenti, që humbi zgjedhjet e vitit 2020 ndaj Bidenit, po e përdor këtë situatë për të vazhduar kritikat ndaj kundërshtarëve të tij politik dhe për të pozicionuar veten si një lider të fortë dhe vendimtar.
Në këtë kontekst, Trumpi po kërkon të rrisë mbështetje për veten, duke spekuluar për një potencial të rikthim në politikën amerikane, sidomos në prag të zgjedhjeve të ardhshme, ku Ukraina dhe marrëdhëniet ndërkombëtare do të jenë tema të rëndësishme debati.
