Autoritetet franceze kanë nisur një hetim pas vdekjes së 46-vjeçarit Raphael Graven, i njohur online si Jean Pormanove, i cili vdiq gjatë një transmetimi live në platformën Kick. Graven ishte bërë i njohur për përmbajtjen e tij, ku shfaqej duke përjetuar dhunë dhe poshtërime nga bashkë-transmetuesit e tij përballë një audiencë online.
Ngjarja ka ndodhur në fshatin Contes, pranë Nicës, dhe prokuroria ka urdhëruar një autopsi dhe ka hapur një procedim penal lidhur me vdekjen e tij. Ministrja franceze për Inteligjencën Artificiale dhe Teknologjinë Digjitale, Clara Chappaz, e cilësoi vdekjen e tij si “të tmerrshme” dhe theksoi rëndësinë e përgjegjësisë së platformave online për përhapjen e përmbajtjeve të paligjshme. Kick France ka deklaruar se do të bashkëpunojë me autoritetet për të hetuar rastin dhe ka nisur një rishikim të përmbajtjes në Francë. Të gjithë bashkë-transmetuesit që e shoqëruan atë gjatë transmetimit janë pezulluar derisa të përfundojnë hetimet.
Avokati i njërit prej bashkë-transmetuesve, Yassin Sadouni, ka pretenduar se dhuna në videot ka qenë e inskenuar dhe se viktima kishte probleme kardiovaskulare, duke sugjeruar se situatat që u panë ishin pjesë e një skenari. Sidoqoftë, mediat franceze kanë publikuar fragmente të transmitimeve, ku Graven shihet duke përjetuar një sërë situatash të dhunshme, si për shembull sulme fizike dhe përdorim të armëve paintball.
Një pyetje e rëndësishme mbetet nëse Graven e pranoi me dëshirë këtë lloj dhune ose nëse u detyrua ta përjetonte. Rasti ka nxitur një diskutim të gjerë mbi etikat e platformave të mediave sociale dhe marrëdhënien mes përmbajtjes dhe sigurisë së përdoruesve. Hetimet e vazhdueshme do të zbulojnë më shumë detaje mbi këtë ngjarje tragjike dhe rolin e platformëve online në përhapjen e përmbajtjeve potencialisht të rrezikshme.
