Futbolli afrikan është në zi pas ndarjes nga jeta të ish-sulmuesit të njohur, Tendai Ndoro, në moshën 40-vjeçare. Ai u gjet i vdekur në banesën e tij në Johannesburg, Afrikë e Jugut. Klubi i tij i dikurshëm, Orlando Pirates, konfirmoi lajmin me një deklaratë zyrtare, duke shprehur pikëllim të thellë për këtë humbje dhe duke ofruar ngushëllime për familjen dhe miqtë e Ndoro-s.
Tifozët e futbollit kanë shpërndarë mesazhe prekëse në rrjete sociale, duke kujtuar karrierën dhe momentet e veçanta të Ndoro-s. Një fans shkroi: “Pusho në paqe, vëlla,” ndërsa një tjetër vlerësoi kontributin e tij në futboll me fraza si “Faleminderit për kujtimet” dhe “RIP legjendë Ndoro.” Një nga golat më të paharruar të tij mbetet ai ndaj Kaizer Chiefs, një moment që do të mbetet i gravuar në kujtesën e tifozëve.
Gjatë karrierës së tij, Ndoro kishte një ndikim të madh në futbollin e Zimbabwes, duke qenë pjesë e Kombëtares nga viti 2013 deri në 2017. Ai zhvilloi 14 ndeshje dhe shënoi pesë gola, përfshirë një gol të rëndësishëm në Kupën e Kombeve të Afrikës 2017 kundër Tunizisë. Ai filloi karrierën e tij me klubin Chicken Inn në Zimbabve, përpara se të kalonte në Premier Ligën e Afrikës së Jugut në vitin 2013.
Ndoro njihej për statistikat e tij të shkëlqyera me Black Aces, ku shënoi 14 gola, dhe me Orlando Pirates bëri histori, duke realizuar 23 gola në dy sezone dhe duke u shpallur golashënuesi i dytë më i mirë i kampionatit në sezonin 2016/17. Pasi kaloi një periudhë në Arabinë Saudite me Al-Faisaly, ai rikthehu në Afrikën e Jugut me Ajax Cape Town dhe Highlands Park, përpara se të ndërpriste karrierën e tij me klubin Al-Orouba në Oman në vitin 2020.
Nuk është bërë i ditur shkaku i vdekjes së Ndoro-s, por raportohet se ai kishte pasur probleme shëndetësore në muajt e fundit. Kjo humbje lë një boshllëk të madh në botën e futbollit afrikan.
