Naun Shundi, një nga figurat më të njohura të teatrit shqiptar, po përballet me një sfidë të rëndë shëndetësore që e ka detyruar të ndalë punën në teatrin e tij, Zonja e Bujtinës, të cilin e themeloi bashkë me gruan e tij, Raimonda. Ai ishte në proces të vënies në skenë të shfaqjes “Il commissario daltonico a teatro”, një veprimtari që përfshin humor, mister dhe absurd. Megjithatë, për shkak të problemeve shëndetësore, ky projekt është pezulluar, sipas një postimi në rrjetet sociale nga Teatri Zonja e Bujtinës.
Shundi aktualisht po ndjek trajtim të specializuar në një spital në Francë, një proces që vjen me koston e tij të lartë, e që deri më tani është mbuluar nga familja e tij. Vetëm disa ditë më parë, televizioni njoftoi se ky teatër festoi tre vjetorin e krijimit. Në një mesazh video për artdashësit, Shundi shprehu rëndësinë e teatrit dhe të krijimeve shqiptare, duke theksuar nevojën për të ruajtur identitetin kulturor në artistikën shqiptare.
Ai kritikoi tendencën e teatrit për t’u komercializuar, duke thënë se një fokusim i tepruar në fitim do ta shndërronte teatrin në një “shitore që shet mallra pa vlerë.” Shundi bëri thirrje për çdo artist dhe adhurues të luftojë për të mbajtur gjallë teatrin, duke e quajtur atë një “krijesë mijëravjeçare” që meriton të ruhet dhe zhvillohet.
Monodrama e fundit e tij, “Njeriu i Pyllit”, trajton çështje të thella njerëzore dhe shoqërore, përfshirë problematikën e bashkëjetesës dhe luftës njerëzore. personazhi i saj ishte një reflektim i vetë artistit, i cili shprehu mjeshtërinë e tij të jashtëzakonshme. Në këtë periudhë të vështirë, Top Channel i dëshiron shërim të shpejtë Naun Shundit dhe rikthim në skenë, ku ka kontribuar për më shumë se 40 vite.
