Komisioni Qendror i Zgjedhjeve (KQZ) po vazhdon përgatitjet për zgjedhjet lokale që do të mbahen më 12 tetor. Një nga aspektet kryesore të këtij procesi është votimi i diasporës, e cila do të jetë në gjendje të votojë vetëm me postë. Tashmë ka nisur regjistrimi i votuesve, dhe të gjithë ata që regjistrohen si votues jashtë Kosovës do të hiqen nga lista e votuesve brenda vendit.
Valmir Elezi, zëdhënësi i KQZ-së, ka sqaruar se një shtetas i Kosovës që regjistrohet për të votuar jashtë do të gjejë emrin e tij në listën e votuesve të diasporës. KQZ do t’i informojë individualisht ata që aplikojnë dhe regjistrohen me sukses.
Për ata që dëshirojnë të rikthehen në vend për të votuar fizikisht, KQZ ka mundësuar një procedurë kthimi. Nëse ndonjë votues i regjistruar jashtë dëshiron të çregjistrohet dhe të kthehet në listën e votuesve në Kosovë, ai duhet të paraqesë një kërkesë te KQZ. Kjo kërkesë mund të bëhet deri në 24 orë para përfundimit të periudhës për kundërshtimin e listës, e cila do të mbyllet më 30 gusht 2025.
Periudha për regjistrimin e votuesve nga jashtë ka filluar më 23 korrik dhe do të zgjasë deri më 29 gusht. Deri më 15 gusht, KQZ ka pranuar 7,026 aplikime për votim me postë, prej të cilave 5,445 janë aprovuar, ndërsa 1,581 janë refuzuar. Ky model votimi me postë është i ngjashëm me atë të praktikës në Shqipëri.
Pas votimit, votuesit do të kenë detyrimin t’i kthejnë fletëvotimet në kutinë postare të KQZ-së në Kosovë, ose në kazionat e hapura në vende të ndryshme të botës nga 17 shtatori deri më 11 tetor. Këto masa përfaqësojnë një përpjekje për të lehtësuar pjesëmarrjen e Kosovës në zgjedhjet lokale, duke u siguruar që edhe diaspora të ketë mundësi të kontribuojë në procesin zgjedhor.
