Në 24 orët e fundit, situata e zjarreve në Shqipëri ka shfaqur përmirësime të dukshme, sipas Ministrisë së Mbrojtjes. Gjatë kësaj periudhe janë regjistruar 28 vatra zjarri, nga të cilat 3 mbeten aktive dhe 6 janë në monitorim.
Një nga vatrat më të komplikuara është ajo në Tërnovë, në Bashkinë Bulqizë, ku zjarri po zhvillohet në një zonë me pyje të dendura, duke u afruar rrezikshëm në drejtim të qytetit të vjetër Bulqizë. Një skuadër e përbërë nga 8 efektivë të MZSH, 4 forca bashkiake dhe 6 forca pyjore po punon për izolimin e zjarrit, të mbështetur nga 30 ushtarë dhe një helikopter.
Në Xeth, Bashkia Fushë-Arrëz, forcat operacionale kanë arritur të ulë intensitetin e flakëve. Rreth 60 forca janë angazhuar për të izoluar zjarri, duke marrë ndihmë edhe nga 80 ushtarë dhe një helikopter. Ndërkohë, në Velë, Bashkia Mirditë, zjarri ka përfshirë rreth 6.5 hektarë masiv me pisha, ku po punojnë 6 efektivë zjarrfikës, 12 forca bashkiake dhe 6 ushtarë.
Në vatrat në monitorim, situata duket më e qetë. Zjarri në Mali me Gropa, Bashkia Bulqizë, po zhvillohet në një zonë shkëmbore dhe nuk përben rrezik, ndihmuar gjithashtu nga angazhimi i vullnetarëve. Të tjera vatra si ato në Zhapokikë, Plashnik dhe Rehovë në Poliçan janë nën kontroll, falë ndërhyrjes së forcave dhe reshjeve të shiut. Situata është gjithashtu nën kontroll në Velçan, Mali i Bërzhitës dhe në disa zona të tjera të Bashkisë Tiranë.
Për shuarjen e zjarreve, janë angazhuar 52 automjete zjarrfikëse dhe 740 forca operacionale, me mbështetje nga 323 forca ushtarake. Pjesëmarrës në operacione janë gjithashtu katër helikopterë dhe një avion nga Italia, që kanë ofruar asistencë në përballimin e situatës. Ky bashkëpunim ka sjellë rezultatet e dëshiruara në kontrollet e zjarreve të rrezikshme që kanë prekur vendin.
