Policia e Los Angelesit ka konfirmuar lidhjen e një vjedhjeje në shtëpinë e aktorit Brad Pitt me një seri grabitjesh të tjera që kanë targetuar personazhe të njohura. Shefi i policisë, Jim McDonnell, ndau informacionin mbi arrestimin e katër të dyshuarve, të cilët përbëjnë një grup të strukturuar që ka kryer vjedhje në pronat e “banorëve të profilit të lartë” në qytet.
Rasti filloi më 25 qershor, kur ndodhi një grabitje në bllokun 2300 të North Edgemont Drive, i njëjti vend dhe datë kur shtëpia e Pitt u plaçkit, edhe pse emri i tij nuk u përmend në raportin fillestar. Pas një periudhe mbikëqyrjeje, policia arrestoi të rinjtë me moshë nga 16 në 18 vjeç, duke gjetur gjithashtu shumë nga sendet e vjedhura. McDonnell theksoi se të dyshuarit kishin lidhje me bandat kriminale dhe ishin të njohur nga autoritetet.
Sipas informacioneve, shtëpia e Pitt në lagjen Los Feliz u pllqit ndërsa ai ishte në një turne promovues për filmin e tij më të ri, “F1”. Po ashtu, aktorë të tjerë si Nicole Kidman dhe Austin Butler, si dhe futbollisti Olivier Giroud, kanë raportuar vjedhje në muajt e fundit.
McDonnell vuri në dukje se hajdutët po përdorin metoda gjithnjë e më të sofistikuara, përfshirë bllokues wifi për të prishur kamerat e sigurimit dhe monitorimin e aktivitetit të të famshmëve në mediat sociale. Ai theksoi gjithashtu se bandat e krimit janë të vetëdijshme për trajtimin më të butë të të miturve në sistemin e drejtësisë amerikane, gjë që ndihmon në intensifikimin e sfidave për policinë.
Ky informacion tregon një rritje të shqetësimeve lidhur me sigurinë e personazheve të njohur dhe tregon se krimi në Los Angeles po bëhet gjithnjë e më i sofistikuar dhe më i organizuar, duke e vënë në rrezik privatësinë dhe integritetin e VIP-ve.
