Popullsia e Shqipërisë vijon tkurrjen, edhe pse tremujori i dytë i vitit 2025 shënoi një shtesë natyrore pozitive prej vetëm 48 lindjesh më shumë se vdekjet.
Sipas të dhënave të INSTAT, gjatë kësaj periudhe u regjistruan 4.982 lindje, 7,4% më pak se një vit më parë, dhe 4.934 vdekje, me një ulje prej 3,7% krahasuar me tremujorin e dytë 2024.
Vetëm katër qarqe të vendit patën shtesë natyrore pozitive, ndërsa tetë të tjera shënuan më shumë vdekje se lindje.
Tirana kryeson me bilancin më të lartë, 691 lindje më shumë se vdekjet, ndërsa në fund të listës është Korça, me 226 vdekje më shumë se lindje.
Korça dhe Fieri në rënie të fortë, Durrësi në kufi
Korça shënoi rënien më të madhe të lindjeve në vend, me 26% më pak se një vit më parë.
Edhe Fieri vazhdon tkurrjen, duke regjistruar vetëm 393 lindje në tre muaj. Ndërkohë, Durrësi, një nga qarqet më të mëdha të vendit, ka rënë në vetëm 528 lindje dhe e ka shtesën natyrore pranë zeros.
Kukësi, i vetmi me rritje
Në të gjithë vendin, vetëm Kukësi regjistroi rritje të lindjeve, me 6,5% më shumë se një vit më parë. Megjithatë, ky qark mbetet ndër më të vegjlit në popullsi, me vetëm 163 lindje gjatë tremujorit.
Lindjet dhe vdekjet sipas qarqeve
Tirana është qarku me më shumë lindje (1.982) dhe njëkohësisht me më shumë vdekje (1.291). Në krahun tjetër, Gjirokastra ka numrin më të ulët të lindjeve, vetëm 74, dhe shënon edhe rënien më të madhe të vdekjeve, me -19,1% krahasuar me vitin e kaluar.
Tendenca e përgjithshme konfirmon se, pavarësisht një bilanci paksa pozitiv në rang kombëtar këtë tremujor, Shqipëria po përballet me një tkurrje të vazhdueshme të popullsisë, ku disa qarqe si Korça dhe Fieri po zbrazën me ritme të shpejta./skyweb.al
