Një katastrofë mjedisore është duke u zhvilluar në bregdetin jugperëndimor të Indisë, pas fundosjes së anijes MSC Elsa 3, e cila ndodhi më 25 maj pranë Kerala-s. Anija 184 metra e gjatë transportonte ngarkesë të rrezikshme dhe derdhi në det mbi 71,500 thasë me grimca të vogla plastike, të njohura si “nurdles”. Këto grimca janë lëndë e parë për prodhimin e plastikës dhe, deri tani, janë rikuperuar vetëm një pjesë shumë e vogël, ndërsa miliona të tjera vazhdojnë të shpërndahen nga stuhitë musonike në bregdetin e Detit Arabik.
Ekspertët paralajmërojnë se mikroplastikat do të mbeten në mjedis për vite me radhë, duke rrezikuar ekosistemet detarë dhe shëndetin e njerëzve që konsumojnë produkte deti, pasi këto grimca mund të thithin toksina dhe baktere të rrezikshme. Komunitetet e peshkatarëve në Kerala janë goditur rëndë nga ndotja, edhe pse ndalimi i peshkimit është hequr. Frika nga ndotja ka ulur ndjeshëm kërkesën për peshk në tregjet lokale. Mënyra e jetesës së shumë familjeve është kërcënuar, duke marë vetëm një kompensim minimal prej 1,000 rupish (rreth 8,50 paund).
Shteti i Kerala-s ka kërkuar 1.1 miliardë dollarë dëmshpërblim nga kompania e transportit MSC, por procesi pritet të zgjasë, ndërsa pastrimi mund të marrë deri në pesë vjet. Ngjarja ka ringjallur thirrjet për rregullore globale mbi transportin e peletave plastike, të cilat aktualisht nuk klasifikohen si materiale të rrezikshme. Aktivistët shpresojnë që bisedimet e kësaj jave në OKB për ndotjen plastike të çojnë në një traktat ndërkombëtar që do të trajtojë prodhimin, paketimin dhe transportin e këtyre materialeve.
Sipas statistikave, rreth 445,000 ton nurdles hyjnë në mjedis çdo vit në botë, dhe prodhimi i plastikës pritet të trefishohet deri në vitin 2060. Ekspertët paralajmërojnë se pa masa të forta, problemi do të bëhet gjithnjë e më i pranishëm dhe i rrezikshëm për mjedisin dhe shëndetin njerëzor.
