Në dy vitet e ardhshme, punonjësit e administratës publike do të përfitojnë paga më të mira dhe më shumë shpërblime, si dhe orare fleksibël. Kjo është pjesë e një strategjie të re të qeverisë për të reformuar administratën dhe për të rritur mirëqenien. Strategjia Ndërsektoriale e Reformës në Administratën Publike, e publikuar në Fletoren Zyrtare, parashikon një kosto prej 9.27 miliardë lekësh (rreth 95.3 milionë euro) për periudhën 2025–2027.
Objektivat kryesore të kësaj strategjie përfshijnë përmirësimin e menaxhimit të burimeve njerëzore, zhvillimin e politikave publike, digjitalizimin e shërbimeve dhe ndërtimin e një administrate më të qëndrueshme dhe miqësore me mjedisin. Një sfidë e rëndësishme do të jetë rekrutimi i punonjësve në bazë të meritave dhe transparencës. Sipas planit, do të ketë një vazhdimësi në konsolidimin e punës fleksibël për të arritur një balancë më të mirë mes jetës profesionale dhe asaj personale për punonjësit publikë, duke përfshirë mundësinë për të reduktuar orarin e punës në disa institucione specifike.
Sistemi i pagave për nëpunësit civil është i rregulluar në përputhje me pozitat e punës, duke ndjekur një model të ngjashëm për institucionet e qeverisjes vendore. Një nga qëllimet kryesore është krijimi i një shërbimi publik inovativ dhe tërheqës, me fokus në digjitalizimin e administratës publike dhe fuqizimin e aftësive digjitale të punonjësve dhe qytetarëve. Çështjet e sigurisë digjitale janë gjithashtu thelbësore, me nevojën për standarde të qarta dhe për të garantuar privatësinë e qytetarëve gjatë ndërveprimeve të tyre digjitale.
Kostoja totale e strategjisë do të shpërndahet në pesë drejtime kryesore, me fokusin më të madh në shërbimet dhe digjitalizimin (7.3 miliardë lekë), duke pasuar llogaridhënien dhe mbikëqyrjen (1 miliard lekë) dhe pjesët e mbetura për menaxhimin e burimeve njerëzore, koordinimin e politikave dhe administratën e gjelbër. Këto nisma kanë si qëllim përmirësimin e cilësisë së shërbimeve publike dhe rritjen e efikasitetit në administratë.
