Një propozim i ri për armëpushim në Ukrainë është paraqitur nga presidenti rus, Vladimir Putin, gjatë një takimi me të dërguarin e posaçëm, Steve Witkoff. Sipas një raporti të Wall Street Journal, ky propozim synon njëndërprerje të menjëhershme të armiqësive, me kushtin kryesor që Ukraina të tërheqë forcat e saj nga rajoni i Donbasit. Rusia do të mbajë kontrollin mbi Donetskun, Luhanskën dhe Krimenë, të cilat i ka aneksuar që nga viti 2014, edhe pse Ukraina ka ende kontroll në disa pjesë të rajonit.
Plani i propozuar nga Moska parashikon një armëpushim të plotë, me dy faza: fillimisht, tërheqja e forcave ukrainase nga Donetsku, e më pas diskutimi për një marrëveshje që do të mbahet më 15 gusht në Alaskë, për të cilën duhet të jetë i pranishëm presidenti ukrainas, Volodymyr Zelensky.
Reagimi i zyrtarëve ukrainas dhe evropianëve është i përzier. Disa shprehin dyshime lidhur me qëllimin e Kremlinit, duke besuar se ky propozim mund të jetë një mënyrë për të shmangur sanksionet dhe tarifat që presidenti amerikan, Donald Trump, kishte paralajmëruar. Zelensky ka theksuar se është i hapur për diskutime mbi territorin, vetëm nëse Rusia pranon një armëpushim të plotë dhe pa kushte. Një zyrtar ukrainas ka konfirmuar se qeveria nuk e përjashton propozimin, por kërkon një armëpushim ndryshe.
Trump, një javë më parë, kishte vënë në dukje se ishte gati të vendoste sanksione ndaj Rusisë në rast se nuk arrihej marrëveshja. Ai shprehu një ndjenjë zhgënjimi, duke theksuar se kishte pasur disa biseda me Putinin që ishin dukur pozitive, por që situata në terren kishte ndryshuar ndjeshëm. “Mendoja se kishim rënë dakord tri herë, por ndoshta ai dëshiron të marrë gjithçka”, tha Trump, duke sugjeruar se negociatat me Putinin do të ishin një sfidë e vështirë.
