Ministria e Mbrojtjes ka raportuar për 13 vatra zjarri të evidentuara në Shqipëri gjatë orëve të fundit. Nga këto, 6 janë shuar ndërsa 7 vazhdojnë të jenë aktive.
Sipas njoftimit, për vatrat e shuara është realizuar një izolim i plotë, ndërsa për ato aktive, situata është e ndryshme. Në qarkun Vlorë, për shembull, zjarri në fshatin Navaricë është spostuar drejt malit, ndërsa në Leshnicë të Poshtme, ndërhyrja ajrore ka shmangur rrezikun për shtëpitë. Në këtë zonë ka operuar helikopteri i Forcës Ajrore dhe dy avionë Fireboss nga Suedia, të cilët kanë kryer 44 hedhje uji.
Në Tragjas, zjarri është aktiv në sipërfaqe me shkurre dhe bimësi të ulët, por aktualisht nuk ka rrezik për banesa. Në qarkun Fier, zjarri në Lofkënd është izoluar me ndihmën e forcave ajrore dhe operohet nga avioni Kroat Canadair.
Në qarkun Lezhë, zjarri vazhdon në fshatin Malaj Epërm, ku 33 forca operacionale po punojnë për të krijuar brez ndarës për të penguar përhapjen e flakëve. Sipërfaqja e prekur vlerësohet në rreth 10 hektarë, por nuk ka rrezik për zonat e banuara.
Në Dibër, vatra e zjarrit në “Mali i Allushit” është riaktivizuar, por aktualisht është vënë nën kontroll dhe nuk ka rrezik për shpërthim të mëtejshëm. Ndërsa në Elbasan, zjarri në fshatin Lleshaj është plotësisht i izoluar dhe po mbahet nën monitorim për të shmangur riaktivizimin.
Në Tiranë, në malin e Bërzhitës, 15 forca nga MZSH janë angazhuar për shuarjen e zjarrit që përfshin një sipërfaqe të dendur bimësie, dhe nuk ka rrezik për shtëpitë në këtë zonë.
Kjo situatë kërkon angazhim të vazhdueshëm nga autoritetet dhe shërbimet emergjente për të mbajtur nën kontroll flakët dhe për të siguruar sigurinë e banorëve.
