Një ngjarje tragjike e ndodhur në Kalabri ka ngritur alarmin në të gjithë zinxhirin agro-ushqimor në Itali. Prokuroria e Paolës ka urdhëruar sekuestrimin urgjent të kavanozëve me brokoli në vaj, të cilët dyshohet se shkaktuan helmim të rëndë nga botulizmi. Një viktimë është konfirmuar, Luigi Di Sarno, 52 vjeç, turist nga Cercola, dhe nëntë persona të tjerë janë shtruar në spital, përfshirë dy anëtarë të familjes së viktimës.
Pas shfaqjes së simptomave, Di Sarno vizitoi një klinikë private në Belvedere Marittimo, por vendosi të kthehej në shtëpi me makinë. Gjatë udhëtimit, gjendja e tij përkeqësohet dhe ai vdes pranë Lagonegro, shumë gjasa për shkak të neurotoksinës që kishte konsumuar. Prokuroria ka nisur hetime mbi “vrasjen si pasojë e një krimi tjetër” dhe “tregtimin e ushqimeve të dëmshme”, dhe po shqyrton përgjegjësinë mjekësore lidhur me trajtimin e tij.
Në përpjekje për të parandaluar raste të reja helmimi, janë bllokuar dhe tërhequr të gjitha kavanozët me brokoli nga tregu. Departamenti i Shëndetësisë i Rajonit Kalabri ka aktivizuar një protokoll emergjent dhe ka marrë masa për menaxhimin e rasteve të botulizmit, duke bërë të mundur që Spitali “Annunziata” i Cosenza-s të ketë një rezervë antidoti për situatën emergjente.
Dhe, vetëm disa ditë më parë, një tjetër rast i ngjashëm ndodhi në Sardenjë gjatë një eventi gastronomik, ku tetë persona përfunduan në spital për shkak të helmimit nga një sallatë guacamole. Në të dy rastet po hetohet për praninë e bakterit Clostridium botulinum, i njohur për prodhimin e neurotoksinës vdekjeprurëse, dhe autoritetet kanë shprehur shqetësim për përhapjen e mundshme të alarmit ushqimor.
Në këtë situatë emergjente, hetimet vazhdojnë me intensitet në disa drejtime për të zbuluar shkakun e helmimeve dhe për të garantuar sigurinë ushqimore në rajon.
