Kompania më e njohur e transmetimeve digjitale në Shqipëri, DigitAlb, ka kaluar zyrtarisht në duart e biznesmenit nga Kosova, Shkëlqim Devolli. Sipas burimeve të besueshme, veprimet ligjore dhe tregtare janë kryer pothuajse të gjitha, ndërsa zbardhja në QKB ende mungon për shkak se kontratat janë të lidhura me kushte pagesash.
Në këtë fazë tranzicioni, administratori i deritanishëm i kompanisë, Eglinor Ramaj, është larguar nga detyra, ndërsa pritet që në ditët në vijim, në krye të DigitAlb të emërohet Kushtrim Gojani, i cili do të përfaqësojë zyrtarisht interesat e Devollit në Shqipëri.
DigitAlb, dikur krenaria teknologjike e shqiptarëve, sot është një kompani me dhjetëra milionë euro borxhe. Kalimi i saj te Devolli duket si një përpjekje për ta ringjallur ose për ta futur në një cikël tjetër interesash, këtë herë të lidhura ngushtë me pushtetin politik dhe mediatik.
Shkëlqim Devolli është një emër i njohur në biznesin kosovar dhe jo vetëm. Ai ka blerë më parë televizionin 
ABC News, por ky kanal, ndonëse në letra në pronësi të tij, kontrollohet faktikisht nga qeveria, përmes bashkëpunëtorit të ngushtë Sokol Balla.
Ky i fundit, sipas informacioneve, ka blerë së fundmi një apartament luksoz prej 500.000 euro në një pallat shumëkatësh të një oligarku ndërtues në Tiranë – një blerje që ngre pyetje të shumta për burimin e të ardhurave dhe lidhjet e interesit.
Kjo lëvizje me DigitAlb nuk është thjesht një shitje biznesi, por një manovër e re në kapjen e medias dhe kontrollit të zërit publik në Shqipëri. Me një kompani dikur të fuqishme në duart e një biznesmeni të lidhur me qeverinë dhe me një borxh të pashlyer mbi supe, pyetja që ngrihet është: kush do ta paguajë faturën për këtë marrëveshje në hije?
