SHBA- Një grua në Florida u arrestua pasi u paraqit si infermiere dhe trajtoi mbi 4,000 pacientë pa licencë. Sipas mediave të huaja, Autumn Bardisa, 29-vjeç, u arrestua të martën pasi u shtir si infermiere e regjistruar dhe trajtoi 4,486 individë në një spital lokal nga korriku 2023 deri në shkarkimin e saj më 22 janar.
“Ky është një nga rastet më shqetësuese të mashtrimit mjekësor që kemi hetuar ndonjëherë”, tha Sherifi Rick Staly në një deklaratë të mërkurën.
Në korrik të vitit 2023, Bardisa u punësua si infermiere teknike e avancuar, duke punuar nën mbikëqyrjen e një infermiereje të regjistruar, thanë zyrtarët. Kur aplikoi për këtë pozicion, ajo deklaroi se ishte një infermiere e regjistruar “edukimi i parë”, që do të thotë se “kishte kaluar shkollimin e kërkuar për t’u bërë infermiere e regjistruar, por nuk kishte kaluar provimin kombëtar për të marrë licencën e saj”, thanë zyrtarët.
Më pas ajo i tha spitalit se i kishte kaluar provimet dhe dha një numër dokumenti “që përputhej me emrin e saj të parë, Autumn, por me një mbiemër të ndryshëm”, tha zyra e sherifit. Bardisa shpjegoi mospërputhjen, duke thënë se “ishte martuar së fundmi dhe kishte një mbiemër të ri”. Spitali kërkoi të shihte dokumentin e saj të martesës për të konfirmuar identitetin e saj, por ajo nuk ua dha kurrë atyre, thanë zyrtarët.
Kur Bardisës iu ofrua një ngritje në detyrë në janar, zyrtarët thanë se një koleg kontrolloi statusin e licencës së saj dhe zbuloi se ajo kishte “një licencë të skaduar të asistentes së infermierisë së çertifikuar” dhe menjëherë ia raportoi gjetjet administratorëve të spitalit.
