Një kopje e rrallë e botimit të parë të romanit të njohur të J.R.R. Tolkien, “Hobiti”, është shitur për 43,000 paund (rreth 50,000 euro) në një ankand në Bath. Ky botim i vitit 1937 është një nga vetëm 1,500 kopjet e tij, dhe sipas shtëpisë së ankandeve Auctioneum, besohet se aktualisht në qarkullim ka vetëm disa qindra të tilla.
Kopja e gjetur ishte në bibliotekën familjare të një shtëpie në Bristol dhe, siç raporton The Guardian, interesimi i koleksionistëve në rang ndërkombëtar e ka rritur çmimin e saj më shumë se katërfish nga vlerësimi fillestar. Caitlin Riley, drejtoreshë e sektorit të botimeve të rralla në Auctioneum, shprehet se askush nuk e kishte ditur për ekzistencën e kësaj kopje, e cila ishte thjesht ruajtur në një bibliotekë të zakonshme. Ajo theksoi se që në shikim të parë, u duk qartë se bëhej fjalë për një kopje origjinale.
Libri ka një kopertinë të veçantë në ngjyrë të gjelbër të çelët dhe përmban ilustrime bardh e zi të realizuara nga vetë Tolkien, i cili krijoi universin e famshëm të Tokës së Mesme ndërkohë që ishte profesor në Universitetin e Oksfordit. Ai u zbulua në bibliotekën personale të Joseph Hubert Priestley, një botanist dhe vëlla i eksploruesit të njohur të Antarktidës, Sir Raymond Priestley.
Vlera e kopjeve të botimit të parë të “Hobitit” është shumë e lartë, sidomos për koleksionistët. Një kopje tjetër, që përmbante një shënim të shkruar me dorë nga Tolkien në anglishten e vjetër, u shit për 137,000 paund (rreth 157,500 euro) në Sotheby’s në vitin 2015. “Hobiti” ka arritur të shesë mbi 100 milionë kopje në të gjithë botën dhe është njohur si pararendës i trilogjisë së “Zotit të Unazave”. Historia e saj u adaptua për ekran në fillim të viteve 2010 me një trilogji epike filmash të realizuar nga Peter Jackson.
