Pas 13 vitesh nga zhdukja misterioze e ish-zyrtarit të lartë të Shërbimit Informativ Kombëtar, Ilir Kumbaro, Policia Metropolitane e Londrës ka rinisur hetimet për ta gjetur atë. Kumbaro, i dënuar në mungesë për krime të rënda si rrëmbimi dhe torturimi i biznesmenit Remzi Hoxha në vitin 1995, është shpallur në kërkim pasi dështoi të paraqitet në një gjykatë londineze në vitin 2011.
Metropolitan Police ka bërë thirrje për ndihmën e publikut në zbardhjen e vendndodhjes së Kumbaros, aktualisht 70 vjeç, duke e publikuar një foto të tij nga koha e arrestimit në vitin 2008. Ai ishte arrestuar për t’u ekstraduar në Shqipëri, por pas disa kohësh u zhduk. Në vitin 2012, një gjykatë shqiptare e dënova në mungesë me 15 vjet burg për krimet e tij.
Rasti i Kumbaros është pjesë e një skene më të gjerë të krimeve të përmasave shtetërore gjatë periudhës së sundimit të Sali Berishës, kur Hoxha dhe dy persona të tjerë u rrëmbyen nga SHIK-u. Hetimet tregojnë se Hoxha u rrëmbye në Tiranë më 21 tetor 1995, por trupi i tij nuk është gjetur kurrë.
Historiku i çështjes është i ngarkuar me vdekje të shumë figurave kyçe, të cilët kishin përfshirje në ngjarjet e saj. Bashkim Gazide, ish-drejtuesi i SHISH, dhe Budjon Mece, një ish-punonjës i SHIK, janë dy nga ata që ndërruan jetë përpara se të bëhej e mundur zbardhja e së vërtetës. Po ashtu, Xhevat Hana, një ish-prokuror që hetoi rastin, vdiq papritur në vitin 2012.
Një çështje thelbësore është se shumë prej atyre që kanë informacion mbi zhdukjen e Hoxhës tani janë jashtë skenës, duke e bërë çdo hetim të ardhshëm edhe më të ndërlikuar. Metropolitani i Londrës tani shpreson se publikimi i informacionit do të ndihmojë në gjetjen e Ilir Kumbaros dhe ndriçimin e kësaj ngjarjeje tragjike.
