Një aksident tragjik ndodhi të hënën në mëngjes në autostradën A1 të Italisë, midis Arezzos dhe Firences, ku një kamion përplasi disa automjete të ndaluara për shkak të një bllokimi trafiku. Në këtë përplasje, tre persona humbën jetën dhe 15 të tjerë u plagosën. Sipas burimeve, aksidenti ndodhi pak para orës 11:00, me trafikun që u ndalua në të dyja korsitë e autostradës.
Kamioni, që u përplas me automjete të tjera një pas një, goditi gjithashtu një autobus turistik dhe një ambulancë, e cila po transportonte një pacient 75-vjeçar. Në përplasje, tre personat që ndodheshin në ambulancë, përfshirë pacientin dhe dy infermierët, humbën jetën.
Nga 15 të plagosurit, njëri ndodhet në gjendje kritike në spitalin Carezzi në Firence, ndërsa katër kanë lëndime më serioze dhe pjesa tjetër ka lëndime të lehta.
Një dëshmitar, Paolo Romaglioli, një avokat nga Arezzo, theksoi se shpëtoi nga një mrekulli pasi arriti të frenonte përpara përplasjeve. Ai përshkroi skenën si shumë dramatike, me ambulancën që u shtyp dhe më pas u përfshi nga flakët, gjë që për fat të mirë u ndal nga disa shoferë që intervenuan.
Autostrada mbeti e mbyllur për disa orë për shkak të hetimeve dhe pastrimit të vendit të aksidentit, ndërsa ngjarja solli tronditje në komunitet.
