Shqetësimet për përshkallëzimin bërthamor midis SHBA-së dhe Rusisë janë rritur pas zhvendosjes së katër bombarduesve bërthamorë Tupolev Tu-95MS më afër Evropës, sipas informacionit nga shërbimi hetimor ukrainas “Insider UA”. Këta bombardues, të zakonshëm në sulme ndaj Ukrainës dhe pjesë e arsenali bërthamor rus, thuhet se janë tashmë të pajisur me raketa, duke rritur rrezikun e një sulmi të mundshëm.
Raportet sugjerojnë se Tu-95MS janë zhvendosur nga baza ajrore Ukrainka në Lindjen e Largët për në bazat Oleny dhe Engels-2, sidomos pasi ato ishin braktisur më parë nga frika e sulmeve ukrainase. Këto lëvizje ndodhin vetëm 24 orë pas deklaratave të Donald Trump, i cili njoftoi se kishte urdhëruar dy nëndetëse bërthamore amerikane të afroheshin më pranë Rusisë si përgjigje ndaj kërcënimeve të Dmitry Medvedev për luftë bërthamore.
Trump theksoi se i kishte dhënë Putinit një ultimatum për të ndaluar zjarrin deri të premten, përndryshe do të përballej me sanksione të reja amerikane. Dërguari i veçantë i Trump, Steve Witkoff, pritet të udhëtojë për në Moskë për bisedime, pas një kërkese kontakti nga regjimi i Putinit. Ndërkohë, zëdhënësi i Kremlinit përpiqet të distancohet nga deklaratat e Medvedevit, duke theksuar se politika e jashtme në Rusinë përcaktohet nga Putin dhe se Rusia nuk dëshiron të përfshihet në një luftë bërthamore, duke nënvizuar se “nuk ka fitues në një konflikt të tillë”.
