Mijëra punonjës të IT-së nga Koreja e Veriut kanë përdorur identitete të vjedhura ose të fabrikuara që i japin mundësinë të punojnë për kompani perëndimore, duke gjeneruar deri në qindra miliona dollarë në vit për programet ushtarake të Phenianit, sipas Departamentit të Drejtësisë së SHBA-së. Zhvilluesit dhe inxhinierët koreano-veriorë janë infiltruar në kompani të njohura, duke punuar në distancë si profesionistë amerikanë, në një përpjekje për të anashkaluar sanksionet ndërkombëtare.
Ekspertët e sigurisë e lidhin këtë strategji me një plan më të gjerë të regjimit për të financuar programin bërthamor. Punonjësit përdorin mjete të përparuar, duke përfshirë inteligjencën artificiale, për të mashtruar punëdhënësit gjatë intervistave. Veprimtaritë e tyre kryhen nga vende si Kina, Laosi dhe Rusia, që kanë lidhje të ngushta me Phenianin.
Një rast i njohur është ai i Christina Marie Chapman, një qytetare amerikane e dënuar me tetë vjet e gjysmë burg për ndihmën që i ka dhënë operativëve të Koresë së Veriut për të siguruar vende pune në mbi 300 kompani, duke gjeneruar 17 milionë dollarë për regjimin e Kim Jong Un. Ajo ndihmonte në vjedhjen e identiteteve dhe pastrimin e të ardhurave.
Ndryshe nga skemat e zakonshme të krimit kibernetik, kjo metodë është më e vështirë për t’u zbuluar, pasi punëtorët japin rezultatet e zakonshme si pjesë e ekipeve korporative. Departamenti Amerikan i Drejtësisë ka ofruar deri në 5 milionë dollarë shpërblim për informacione mbi këtë skemë, ndërsa Koreja e Veriut e cilëson këtë si fushatë shpifëse të SHBA-së.
