Kopshti Zoologjik i Aalborgut në Danimarkë ka nisur një fushatë për të inkurajuar qytetarët të dhurojnë kafshët e tyre shtëpiake të shëndetshme, por të padëshiruara, si pula, lepuj dhe kuaj, për të ushqyer grabitqarët e tij. Kafshët e dhuruara eutanizohen butësisht nga stafi dhe përdoren për të ushqyer luanë, tigra dhe rrëqebuj, duke imituar dietën natyrore që këto kafshë do të kishin në habitatin e tyre. Zyrtarët e kopshtit theksojnë se ky lloj ushqimi ndihmon në mirëqenien e grabitqarëve, duke qenë se mishi industrial nuk ofron të njëjtat përfitime.
Zëvendësdrejtoresha Pia Nielsen shpjegoi se kjo praktikë, e zakonshme në Danimarkë, është një nevojë për kafshët mishngrënëse që kërkojnë mish të freskët me lesh dhe kocka si pjesë e dietës së tyre natyrale. Donacionet pranohen gjatë javës, me limit prej katër kafshësh në çdo herë. Kuajt duhet të kenë pasaportë dhe të mos kenë patur trajtime për sëmundje në 30 ditët e fundit. Donatorët mund të përfitojnë edhe një zbritje tatimore.
Praktika ka shkaktuar debate në publik, me disa që e mbështesin si një mënyrë efektive, ndërsa të tjerë e shohin si të ashpër. Megjithatë, kopshti thekson se kjo është një mënyrë etike dhe transparente për menaxhimin e resurset dhe për të siguruar një trajtim sa më natyror për kafshët mishngrënëse. Shumë qytetarë e mirëpresin këtë mundësi si një kontribut për mirëqenien e kafshëve dhe për të shmangur braktisjen e atyre të padëshiruara.
