Sekretari i Përgjithshëm i Këshillit Norvegjez për Refugjatë, Jan Egeland, ka shprehur shqetësim për situatën humanitare në Gaza, duke theksuar se ndihmat që mbërrijnë janë të pakta dhe shumë vonë, duke rrezikuar jetën e civilëve palestinezë. Gjatë një interviste, ai njoftoi se disa kamionë kanë sjellë ndihma, por ato janë të pamjaftueshme për nevojat emergjente të popullsisë. Egeland e cilësoi shpërndarjen e ndihmave si kaotike dhe të paorganizuar, duke e akuzuar Izraelin për krijimin e një situate të rëndë.
“Ka pasur një sistem për të shpërndarë ushqimin, por tani po ndodh një vërtetë kaos; njerëzit po luftojnë për të kapur ndihmat,” theksoi ai, duke e krahasuar këtë situatë me “lojëra urie”. Në lidhje me planin e kryeministrit izraelit, Benjamin Netanyahu, për pushtimin e Gazës, Egeland paralajmëroi se kjo do të çonte në më shumë gjakderdhje, duke theksuar rëndësinë e negociatave si një mënyrë për të liruar pengjet dhe për zgjidhjen e konfliktit.
Ai potencoi se negociatat kanë dhënë rezultate më të mira se vazhdimi i luftës, të cilën e përshkroi si “të pakuptimtë”. Situata në Gaza është jashtëzakonisht e tensionuar, me krizat humanitare që thellohen çdo ditë, ndërsa komuniteti ndërkombëtar po kërkon me ngulm zgjidhje urgjente për të mbrojtur jetën e civilëve.
