Autoritetet serbe kanë arrestuar Behar Preniqi, një shtetas kosovar, në pikën kufitare Batrovi, mes Kroacisë dhe Serbisë, njoftoi të martën Ministria e Punëve të Jashtme dhe Diasporës së Kosovës (MPJD). Detajet mbi akuzat që e kanë çuar në arrestim nuk janë të qarta, dhe MPJD ka bërë një kërkesë zyrtare për sqarime nga autoritetet serbe.
Ministria shprehu shqetësim të thellë për rritjen e rasteve të arrestimeve të paprovokuara të qytetarëve kosovarë nga Serbia, duke e cilësuar arrestimin e Preniqit si një shembull të qartë të praktikave të papranueshme nga autoritetet serbe, që bien ndesh me të drejtën ndërkombëtare dhe standardet për mbrojtjen e të drejtave të njeriut. Zyra Ndërlidhëse e Kosovës në Serbi ka kontaktuar familjen e Preniqit dhe është angazhuar për të siguruar informacione të plota lidhur me këtë rast.
MPJD i ka njoftuar gjithashtu delegacionin e Bashkimit Evropian dhe misjonet diplomatike të vendeve të QUINT-it për arrestimin. Ministria bën thirrje për reagim të fuqishëm nga Bashkësia Ndërkombëtare ndaj veprimeve represive të Serbisë, që cenojnë parimet e së drejtës ndërkombëtare dhe konventat për të drejtat e njeriut.
Gjithashtu, MPJD përsëriti thirrjen për shtetasit kosovarë që të shmangin udhëtimet përmes territorit të Serbisë. Ky arrestim vjen pas tensioneve të rritura mes dy vendeve, pasi Kosova ka arrestuar gjithashtu shtetas serbë, duke përfshirë zyrtarin Igor Popoviç, i cili është akuzuar për nxitje të përçarjes dhe mosdurimit.
