Në Itali, tre shtetas shqiptarë janë arrestuar për transformimin e një ferme në një laborator për përpunimin e kokainës. Njëri prej të arrestuarve është 39 vjeç, ndërsa dy të tjerët janë 37 dhe 38 vjeç. Ata akuzohen për posedimin dhe shpërndarjen e drogës.
Sipas autoriteteve italiane, gjatë operacionit janë sekuestruar rreth dy kilogramë kokainë e përpunuar, si dhe pajisje për përzierjen dhe paketimin e saj. Laboratori ishte vendosur në një shtëpi në Pontenure, ku shqiptarët përziezhnin kokainën e pastër me acid dhe pluhur për ta shitur më pas në tregun e drogës.
Policia kishte vënë në ndjekje dy prej tyre, të cilët udhëtonin me makina të ndryshme dhe ishin takuar në një bar. Pas kësaj, ata shkuan në fermë, ku u bashkuan me një person të tretë. Hetuesit i ndoqën dhe i kapën në flagrancë teksa pastronin dhe transportonin pajisjet e laboratorit, përpara se të dorëzonin sasinë e kokainës një blerësi në afërsi.
Gjatë kontrollit në banesën e fermës, autoritetet gjetën një kilogram përzierës, detergjentë, një furrë elektrike, peshoresa precize dhe rreth 4000 euro cash, të dyshuara se janë fituar nga aktiviteti kriminal. Hetimet vazhdojnë për të zbuluar lidhjet e mundshme të këtij grupi me rrjete më të gjera të trafikut të drogës në Itali. Arrestimet janë një tregues i përpjekjeve të policisë për të luftuar krimin e organizuar dhe shpërndarjen e narkotikëve.
