Kryeministri Edi Rama, përmes një postimi në rrjetin social “X”, ka ironizuar kritikët e draftit të ri të Kodit Penal, duke i cilësuar “të alarmuar” dhe duke sugjeruar që të bëjnë kujdes nga ekspozimi në diell. Ai theksoi se drafti i hartuar nga ekspertët është prezantuar për të mbledhur opinione në mënyrë demokratike dhe transparente. Rama nënvizoi se problemi i vërtetë në Shqipëri nuk është vetë drafti apo regjimi, por përdorimi i lirisë për të dhënë sherr dhe shamata.
Megjithatë, reagimi i tij në këtë kontekst ka hasur në shqetësimin e aktorëve ndërkombëtarë si Bashkimi Evropian, i cili ka shprehur kundërshti të forta ndaj ndryshimeve të propozuara. Zyra e Delegacionit të BE-së në Tiranë tërheq vëmendjen se këto ndryshime nuk përputhen me standardet europiane dhe mund të ndikojnë negativisht në të drejtat e qytetarëve, lirinë e shprehjes dhe lirinë e medias. Delegacioni kërkoi konsulta gjithëpërfshirëse me institucionet e drejtësisë dhe shoqërinë civile për të siguruar cilësinë e legjislacionit, duke e lidhur këtë me angazhimet e Shqipërisë në procesin e anëtarësimit.
Përveç BE-së, edhe OSBE-ja në Shqipëri ka shprehur distancimin nga ky proces, duke theksuar që ndryshimet në Kodin Penal kërkojnë kohë dhe konsultime të thelluara. Ajo është e gatshme të ofrojë rekomandime për përmirësimin e tij, duke vënë në dukje rëndësinë e forcimit të institucioneve demokratike dhe të shtetit të së drejtës.
