Prokuroria e Fierit ka hapur një hetim ndaj kompanisë koncesionare “Bankers Petroleum Albania”, e cila operon në fushat e naftës në Patos, Marinzë dhe Fier. Sipas dosjes hetimore, kompania, që ka nxjerrë dhe shitur mbi 5 miliardë dollarë naftë bruto, ka kryer një sërë shkeljesh ligjore me pasoja të rënda financiare për shtetin. Një nga akuzat kryesore është se “Bankers Petroleum” nuk ka paguar asnjë taksë, duke manipuluar faturat në mënyrë fiktive për të shmangur detyrimet fiskale. Përveç kësaj, kompania ka kërkuar dhe marrë rimbursime për tatimin mbi vlerën e shtuar (TVSH) nga shteti, pavarësisht se nuk ka paguar taksat.
Dosja përmban prova të plota se në furnizimin e transportit të mallrave, faturat e lëshuara nuk janë përputhur me kërkesat ligjore, pasi nuk janë lëshuar në momentin e shërbimit. Analiza e blerjeve ka zbuluar një mungesë të dhënash identifikuese të nevojshme në faturat e blerjes, duke e bërë të pamundur verifikimin e saktësisë së deklaratave të kompanisë. Po ashtu, janë identifikuar shkelje të ngjashme dhe në punimet e ndërtimit, ku janë faturuar shërbime që nuk janë realizuar.
Prokuroria thekson se gjatë një periudhe të caktuar, “Bankers Petroleum” ka faturuar 100% shërbim “Stand by”, pa kryer asnjë aktivitet të ligjshëm, çka konfirmon abuzimin me normat dhe rregullat fiskale. Ajo që rezulton nga hetimi është një skemë e ndërlikuar evazionizmi, që dëmton rëndë financat publike.
