TIRANË- Janë zbardhur detaje të reja lidhur me hetimin e aferës së kompanisë “Bankers Petroleum”. Siç shihet në dokumentin e mëposhtëm, kompania “Albstar” më pronar Idajet Ismailajn është firma kryesore kontraktuese e Bankers më faturime fiktive, mashtrim të shtetit apo përfitim me skemën e TVSH-së, fryrje artificiale të shpenzimeve dhe pastrimin e parave.
Kjo gjë rezulton edhe në dosjen e Prokurorisë së Fierit që po heton Bankers, ku dokumentet tregojnë se vetëm gjatë vitit 2011, kompania Albstar e Idajet Ismailajt ka përfituar 22 milionë euro nga Bankers në funksion të skemës së fryrjes së shpenzimeve dhe zhvatjes së pasurisë nëntokësore të Shqipërisë. Më pas në vijim thuhet se kompania ka përfituar miliona euro.
Pronari i “Albstar”, Idajet Ismailaj, në shtator të 2016, bashkë me familjen themeloi kompaninë e ndërtimit Reas 16, me emër të ndryshuar në IR shpk. Sipas Prokurorisë së Fierit, përmes kësaj kompanie, Ismailaj ka nisur të qarkullojë qindra mijëra euro të Bankers me fatura fiktive, duke e rritur xhiron e “IR shpk”, në 6 milionë euro dhe fitimet rreth 2 milionë euro. Bëhet me dije se institucionet shtetërore si AKBN dhe organi i akuzës kanë faktuar se në të dy linjat faturimet kanë qenë fiktive, pra nuk është bërë ndonjë punë, por janë vjedhur paratë që duhet të derdheshin në arkën e shtetit.
Ndërkohë, nga verifikimi i listës së pagave të kompanisë Albstar, ka rezultuar se Sadik dhe Idajet Ismailaj, babë e birë, pronarë të kompanisë, i kanë caktuar vetes një pagë 85 mijë euro në muaj (170 mijë euro në muaj të dy), rreth 2 milionë euro në vit.
Prokuroria e Fierit lëshoi 14 masa sigurie për veprat penale “Krijimi i skemave mashtruese lidhur me tatimin mbi vlerën e shtuar”, “Fshehja e të ardhurave”, “Pastrimi i produkteve të veprës penale ose veprimtarisë kriminale”, “Shpërdorimi i detyrës” dhe “Moskryerja e detyrave nga organet tatimore”. Nga këto masa sigurie u ekzekutuan vetëm 9 prej tyre ndaj personave drejtues të kësaj kompanie, mes tyre administratori aktual i shoqërisë, Hongping Xiao dhe ish-administratori, Leonidha Çobo. Ndërkohë në kërkim janë 5 shtetas të huaj. Gjithashtu bëhet me dije se nga hetimet e deritanishme ka rezultuar se shoqëria “Bankers Petroleum Albania Ltd”, prej 20 vitesh nuk ka paguar tatime, pavarësisht se janë nxjerrë e tregtuar sasi të konsiderueshme karburanti në zonat e njohura me rezerva nafte, Patos-Marinëz-Fier. Po ashtu nga hetimi, dyshohet se dëmi i shkaktuar në buxhetin e shtetit, përmes përfitimit të Tvsh-së, është në miliona euro.
Dyshohet se, gjatë gjithë periudhës që ka ushtruar aktivitetin e saj, “Bankers Petroleum Albania Ltd” ka rritur në mënyrë fiktive shpezimet e saj, me qëllim që në bilancin vjetor të rezultojë me humbje, e më pas nuk ka paguar asnjë tatim mbi fitimin, por ka përfituar nga rimbursimi i TVSH-së nëpërmejt skemave mashtruese. Për arritjen e këtij qëllimi, nga shoqëria e punonjësit e saj dyshohet se janë falsifikuar dokumente të ndryshme dhe kryhen operacione financiare të natyrave të ndryshme me operatorë dhe individë të ndryshëm si brenda dhe jashtë Shqipërisë.
