UKRAINË- Organi mbikëqyrës antikorrupsion i Ukrainës ka njoftuar se kishte zbuluar një skemë të madhe korrupsioni që përfshinte kontrata shtetërore për blerjen e dronëve ushtarakë dhe sistemeve të bllokimit të sinjaleve me çmime të zmadhuara.
Sipas deklaratës zyrtare të publikuar në mediat sociale, në skemën e korrupsionit janë të përfshirë një deputet në detyrë, dy zyrtarë vendorë dhe një numër të paspecifikuar anëtarësh të Gardës Kombëtare. Emrat e personave të përfshirë nuk u bënë publikë, ndërsa thuhet se katër persona thuhet se janë arrestuar.
“Thelbi i skemës ishte lidhja e kontratave shtetërore me kompanitë e furnizimit me çmime të fryra qëllimisht”,thuhej në deklaratën e NABU dhe SAPO, me autorët që merrnin komisione deri në 30% të vlerës së secilës kontratë.
Skandali doli në dritë vetëm dy ditë pasi parlamenti ukrainas miratoi një ligj që rikthente pavarësinë e plotë të inspektorëve dhe prokurorëve anti-korrupsion të Ukrainës, NABU dhe SAPO.
Rivendosja e pavarësisë së tyre u konsiderua e nevojshme pasi shpërthyen protesta masive për shkak të një vendimi të mëparshëm për t’i vendosur ata nën kontrollin e prokurorit të përgjithshëm, një veprim që shkaktoi protestat më të mëdha në vend që nga fillimi i pushtimit rus në vitin 2022.
Sipas Reuters, Volodymyr Zelensky, i cili ka kompetenca të gjera në kohë lufte dhe ende gëzon mbështetje publike, u detyrua të bënte një kthesë të rrallë politike.
Vendimi i tij për t’i vendosur dy autoritetet nën kontrollin e prokurorit të përgjithshëm shkaktoi trazirat e para sociale në të gjithë vendin gjatë kohës së luftës. Nën peshën e protestës popullore, Zelensky deklaroi se kishte “dëgjuar zemërimin e popullit” dhe vetë i paraqiti Parlamentit projektligjin që rikthente pavarësinë e dy autoriteteve, i cili u miratua të enjten.
Vendimi u mirëprit nga partnerët evropianë të Ukrainës, të cilët kishin shprehur tashmë shqetësime të forta në lidhje me ndikimin e ndërhyrjes fillestare në procesin e pranimit të vendit. Zyrtarët e lartë evropianë e kishin paralajmëruar Zelenskyn se dobësimi i NABU-së dhe SAPO-s mund të dëmtonte seriozisht perspektivat e vendit për t’u bashkuar me Bashkimin Evropian.
Pas takimit të shtunën me krerët e dy agjencive, të cilët e informuan atë mbi progresin e hetimit, Zelensky përsëriti angazhimin e tij për të luftuar korrupsionin. “Është e rëndësishme që institucionet antikorrupsion të veprojnë në mënyrë të pavarur dhe ligji i miratuar të enjten u jep atyre çdo mundësi për një luftë të vërtetë kundër korrupsionit”, tha ai.
