Juventusi dhe Reggiana barazuan 2-2 në një ndeshje miqësore të zhvilluar në kompleksin stërvitor të bardhezinjve në Torino. Performanca e Juventusit nuk ishte në nivelin e pritshëm, duke shërbyer si një “sinjal alarmi” për trajnerin Igor Tudor dhe stafin e tij.
Ndeshja filloi me një gabim në prapavijë nga Juventus, që dha mundësinë e parë për Reggianan, e cila shënoi me Girma pas 22 minutash lojë. Reagimi i “Zonjës së Vjetër” ishte i shpejtë, pasi Conceicao barazoi me një goditje të saktë nga jashtë zone, pas asistit të Davidit.
Pjesa e dytë filloi me 11 zëvendësime për trajnerin Tudor, ndërsa Juventus u duk më agresiv në kërkimin e golave. Pas vetëm dy minutash lojë, Vlahovic realizoi golin e dytë për Juventusin, duke shtyrë një top të mbetur në zonë. Megjithatë, pavarësisht kontrollit të lojës, skuadra nuk arriti të shënonte golin e tretë, duke goditur traun e portës.
Në minutën e 72-të, Vallarelli asistoi për Gondo Cedric, që shënoi me kokë për të barazuar ndeshjen në 2-2. Kjo ishte një nisje jo e mirë për Juventusin, i cili do të transferohet në Gjermani për të vazhduar fazën përgatitore dhe do të ketë një test miqësor me Dortmundin në vazhdim.
