Armando Broja ka vendosur të vazhdojë karrierën e tij në Premier Ligë, por jo më te Chelsea. Sipas ekspertit të merkatos, Fabrizio Romano, Chelsea dhe Burnley kanë arritur një marrëveshje për transferimin e tij. Kjo do të jetë një shitje përfundimtare, jo huazim. Informacionet tregojnë se Broja ka dhënë pëlqimin e tij për këtë kalim dhe do të udhëtojë shpejt për të kryer vizitat mjekësore dhe për të firmosur me ekipin e ri.
Burnley, i udhëhequr nga ish-mesfushori anglez Scott Parker, është ngjitur nga Championship në Premier Ligë këtë sezon. Klubi ka ambicie të ngjitet edhe më lart dhe po përpiqet të forcojë skuadrën me lojtarë cilësorë për të shmangur një rikthim në nivelet më të ulëta. Së fundmi, skuadrës i është bashkuar edhe Kyle Walker, ish-kapiteni i Manchester City-t, që do të kontribuojë në forcimin e repartit mbrojtës.
Për Brojën, kjo është një mundësi për të provuar veten në një mjedis të ri dhe për të ndihmuar Burnley-n në objektivat e saj. Transferimi i tij pritet të sjellë një frymë të re në skuadër dhe të kontribuojë në suksesin e saj të ardhshëm në Premier Ligë. Kjo duke pasur parasysh se skuadra përballet me sfida të reja dhe duhet të tregojë që ka kapacitet për të qëndruar në elitë. Me përforcime të tilla si Broja, Burnley shpreson t’i bëjë ballë konkurrencës së ashpër të Premier Ligës.
