BOSNJE HERCEGOVINA- Vendimi i formës së prerë ndaj Milorad Dodikut, si dhe Ligji zgjedhor i Bosnjë e Hercegovinës, flasin qartë se ai duhet të pushojë së ushtruari detyrën e presidentit të Republikës Serbe. Siç raporton klix.ba, kompetenca për zbatimin e këtij vendimi është pjesërisht në Komisionin Qendror Zgjedhor, dhe pjesërisht në agjencitë e sigurisë dhe në Gjykatën e Bosnjë e Hercegovinës.
Hapi i ardhshëm ligjor pas vendimit ndaj Dodikut është në dorë të Komisionit Qendror Zgjedhor (KQZ), pasi ata, brenda 15 ditëve nga marrja e vendimit të formës së prerë, duhet t’i heqin mandatin Dodikut, dhe pastaj brenda 90 ditëve të shpallin zgjedhje të parakohshme. Për heqjen e mandatit duhet të njoftohet institucioni i presidentit të RS-së, por vendimi i KQZ-së nuk garanton që Dodik do të japë dorëheqjen, pasi ai më parë ka shkelur ligjet shtetërore dhe ka vepruar arbitrarisht, për çka në thelb është dënuar.
Në rast të shkeljes së masës së ndalimit, që në vendimin ndaj Dodikut lidhet me ndalimin për të ushtruar funksionin e presidentit të RS-së, Gjykata ka të drejtë t’i shqiptojë dënim me burg në kohëzgjatje sa kohë i ka mbetur deri në përfundimin e ndalimit. Kjo do të thotë që nëse ai refuzon të largohet menjëherë nga detyra, mund të marrë deri në gjashtë vjet burg.
Gjithashtu, Gjykata e Bosnjë e Hercegovinës mund të nxjerrë urdhër që agjencitë e sigurisë ta dërgojnë në burg, megjithatë një urdhër i tillë është nxjerrë më parë dhe të gjithë e dimë që Dodiku nuk përfundoi në burg, por urdhri u anulua. Gjykata do të urdhëronte, në rast shkeljeje të vendimit dhe ndalimit, më së shumti Agjencinë Shtetërore për Hetim dhe Mbrojtje (SIPA) që ta arrestojë Dodikun, ndërsa ata kanë të drejtë të delegojnë këtë në nivel më të ulët, që në këtë rast është Ministria e Punëve të Brendshme e RS-së.
Është e qartë që MUP-i i entitetit nuk do ta arrestojë Dodikun, kështu që mbetet çështja nëse SIPA do të përsërisë se nuk mund ta dërgojë në burg, ashtu siç ndodhi edhe më parë kur ndaj tij ishte shpallur fletë-arresti i kuq. Në rast se policia dhe agjencitë e sigurisë refuzojnë të veprojnë sipas kërkesës së Gjykatës së BiH, kjo do të ishte një humbje e madhe për institucionet e drejtësisë në Bosnjë e Hercegovinë, pasi vetë vendimet nuk vlejnë nëse nuk mund të zbatohen.
