Delegacioni i Bashkimit Evropian në Tiranë ka reaguar në lidhje me draftin e Kodit të ri Penal, të propozuar nga Ministria e Drejtësisë, që ka shkaktuar debate të forta në komunitetin juridik dhe sistemin e drejtësisë. Ekspertët e BE-së theksojnë se ky kod është hartuar nga një grup ekspertësh të përzgjedhur nga Qeveria, në të cilin ata nuk kanë marrë pjesë, dhe janë të vetëdijshëm për shqetësimet që ka ngritur ky draft.
BE shpreh shqetësim për disa nga ndryshimet e propozuara, të cilat mund të ndikojnë negativisht në të drejtat e qytetarëve, lirinë e shprehjes dhe lirinë e medias. Këto dispozita, sipas tyre, nuk përputhen me standardet e Bashkimit Evropian. Delegacioni thekson nevojën për t’i adresuar këto shqetësime në kuadër të procesit të konsultimit dhe angazhimeve të Shqipërisë për anëtarësim në BE.
Rishikimi i Kodit Penal, sipas BE-së, është një proces thelbësor dhe kompleks, i cili ka ndikim të rëndësishëm në shoqëri dhe sistemin e drejtësisë. Prandaj, theksohet rëndësia e konsultimit të plotë me të gjitha institucionet kryesore të drejtësisë dhe shoqërinë civile për të siguruar cilësinë e ligjislacionit të ri.
BE inkurajon Shqipërinë të përparojë me ndryshimet legjislative që janë të domosdoshme për përmbushjen e standardeve evropiane, duke përfshirë çështje si dekriminalizimi i shpifjes dhe rishikimi i ligjeve për trafikun e drogës dhe njerëzve. BE është e gatshme të ofrojë ndihmë teknike në këtë proces.
