Një 29-vjeçar me inicialet Gj. P., banues në fshatin Mserr, është arrestuar nga Policia e Tropojës pasi ishte shpallur në kërkim për kultivimin e bimëve narkotike. Ai ishte nën masën “Arrest në burg”, të vendosur nga Gjykata e Shkallës së Parë e Juridiksionit të Përgjithshëm Kukës.
Arrestimi i tij është rezultat i operacionit policor të koduar “Lekbibaj”, i cili u organizua pas informacioneve të marra në rrugë operative. Policia arriti ta lokalizojë dhe kapë shtetasin në vendin e quajtur “Kodra e Markajve”.
Sipas hetimeve, Gj. P. dyshohet se ka kultivuar bimë narkotike gjatë vitit 2022 në fshatin Mserr. Pas arrestimit, materialet procedurale janë përcjellë në Prokurorinë për veprime të mëtejshme ligjore.
Policia e Tropojës vazhdon të intensifikojë punën për identifikimin dhe kapjen e personave të tjerë që janë shpallur në kërkim, duke shprehur angazhimin e saj për të luftuar paligjshmërinë dhe kultivimin e bimëve narkotike në zonën e Tropojës.
