Kreu i Strukturës së Posaçme Anti-Korrupsion (SPAK), Altin Dumani, organizoi një takim informal me gazetarët, në të cilin trajtoi çështjen e hetimeve të institucionit. Një nga temat kryesore ishte dosja e Ceno Klosit, i cili pritet të marrë mandatin e deputetit në shtator, pas fitimit në zgjedhjet e 11 Majit në Qarkun e Fierit. Dumani konfirmoi se “hetimet për Ceno Klosin vijojnë”, pa ofruar detaje të tjera.
Ceno Klosi është një zyrtar i njohur, i besnik i Belinda Ballukut, i cili ka ushtruar disa pozita kryesore në administratë, duke përfshirë Drejtorin e Përgjithshëm të Tatimeve dhe zëvendësministër të Infrastrukturës dhe Energjitikës. Hetimet për Klosin kanë nisur që nga marsi i vitit të kaluar, me akuzat për “korrupsion”, “shpërdorim të detyrës”, “mashtrim” dhe “falsifikim dokumentesh”. Këto hetime u regjistruan pas dy kallëzimeve nga Partia Demokratike, e cila është angazhuar për të denoncuar trajtat e mundshme të korrupsionit.
SPAK ka krijuar dy procedime penale të veçanta lidhur me Klosin, duke i bashkuar ato në një proces të vetëm. Ai ka dëshmuar për hetimet ndaj tij në SPAK më 31 Tetor të vitit të kaluar, por pas asaj date informacionet për progresin e hetimeve mbeten të paqarta. Klosi, aktualisht nën hetim, po përpiqet të shfrytëzojë pozitën e tij si deputet si një “mburojë” për të shmangur ndjekjen penale.
