Një tërmet i fuqishëm me magnitudë 8.8 goditi Gadishullin Kamchatka në lindje të Rusisë mëngjesin e së mërkurës, më 30 korrik 2025, në orën 01:35 sipas kohës lokale. Epiqendra e tërmetit ishte 131 kilometra në juglindje të qytetit Petropavlovsk-Kamchatsky dhe fillimisht ishte vlerësuar me 8.0 nga USGS, por më vonë u përditësua në 8.8, ndërsa EMSC raportoi 7.6. Tërëmeti kishte një thellësi prej 19.3 kilometrash dhe ndjesitë ishin të forta në të gjithë gadishullin.
Ministria Ruse e Emergjencave raportoi se një cunami me lartësi 3-4 metra ishte regjistruar në disa zona të rajonit, me pamje që tregonin valët që arrijnë në Petropavlovsk. Tërmeti ndodhi në një zonë sizmikisht aktive, ku janë regjistruar tërmete të mëdhenj edhe në të kaluarën, si ai i vitit 1952.
Paralajmërimet për cunami u shtrinë edhe në Japoninë, Alaskën dhe Guam, duke u përmendur rreziku në “Unazën e Zjarrtë të Paqësorit”. Disa persona raportuan lëndime, përfshirë një burrë që u hodh nga një dritare në panik. Megjithatë, Ministri i Shëndetësisë, Oleg Melnikov, tha se askush nuk ishte në gjendje të rëndë.
Guvernatori i Kamchatkës, Vladimir Solodov, e cilësoi ngjarjen si tërmetin më të fuqishëm të dekadës dhe raportoi dëme në një kopsht fëmijësh, ndërsa një qytet në Severo-Kurilsk u urdhërua të evakuohej. Gadishulli, që ndan Detin e Ohotskut nga Oqeani Paqësor, është një nga zonat më sizmikisht aktive në botë.
