Më shumë se gjysma e tokës në Evropë dhe rajonin e Mesdheut u prek nga thatësira në fillim të korrikut, sipas të dhënave nga Observatori Evropian i Thatësirës (EDO). Kjo përbën nivelin më të lartë që nga fillimi i matjeve në vitin 2012 dhe është 21 pikë përqindjeje mbi mesataren për të njëjtën periudhë të viteve 2012-2024. Ndërsa niveli i thatësirës ka shënuar një rënie krahasuar me fundin e qershorit, ku 55.5% e tokës ishte e prekur, situata mbetet alarmante.
Evropa Lindore është rajoni më i goditur, me Kosovën, Serbinë dhe Bullgarinë që kanë pothuajse 100% të territorit nën ndikimin e thatësirës. Në Bullgari, mbi 156,000 banorë janë prekur nga ndërprerjet në furnizimin me ujë. Në Hungari, 47% e territorit ka arritur nivelin e paralajmërimit, një rritje e ndjeshme krahasuar me fundin e qershorit.
Situata është e rëndë edhe në Mesdheun Lindor, ku 95% e Armenisë dhe 77% e Turqisë janë të prekur, me erëra të forta që kanë nxitur zjarre të shumta. Në Siri, gjysma e territorit është e prekur nga thatësira, duke rrezikuar korrjet dhe duke kërcënuar 16 milionë njerëz me pasiguri ushqimore.
Në Evropën Perëndimore, situata varia. Në Mbretërinë e Bashkuar, 18% e territorit është nën nivelin e paralajmërimit, ndërsa Franca përballet me 12%. Sidoqoftë, Spanja dhe Portugalia janë ndër vendet më pak të prekura. Theksohet se thatësira po ndikon dukshëm në sektorët e ndryshëm, duke rritur shqetësimet për ushqimin dhe burimet ujore.
