Bashkimi Europian njoftoi se sistemi i ri i kontrollit kufitar për shtetasit nga jashtë bllokut evropian, i njohur si Sistemi i Hyrje/Daljes (EES), do të fillojë zbatimin më 12 tetor 2025. Ky sistem ka për qëllim të eliminojë vendosjen e vulave në pasaporta dhe të regjistrojë datat e hyrjes dhe daljes së vizitorëve, duke mbledhur gjithashtu të dhëna biometrike si fotografitë e fytyrës dhe gjurmët e gishtërinjve. Zbatimi i EES-së ishte planifikuar për nëntorin e vitit të kaluar, por u shty për shkak të gatishmërisë së disa vendeve anëtare.
Sistemi do të zbatohet gradualisht në kufijtë e jashtëm të 29 shteteve evropiane për një periudhë gjashtëmujorë. Kjo do t’u japë kohë vendeve, pasagjerëve dhe industrisë së transportit për t’u përshtatur me procedurat e reja. EES do të zbatohet për rreth 60 vende, duke përfshirë ato të Ballkanit Perëndimor dhe disa vende të tjera jashtë BE-së.
Ekziston frika se implementimi i këtij sistemi do të shkaktojë radhë të gjatë nëpër pika kufitare. Megjithatë, komisionari për Migrim, Magnus Brunner, tha se EES do të rrisë sigurinë duke ndihmuar në identifikimin e personave që tejkalojnë kohën e qëndrimit dhe në parandalimin e lëvizjeve të parregullta.
Para fillimit të zbatimit, do të ketë fushata informuese në aeroporte dhe pikëkalime kufitare, ndërsa periudha gjashtëmujore është konsideruar e mjaftueshme për përshtatjen e të gjitha palëve të përfshira.
