TIRANË- Ministria e Mbrojtjes ka dalë me një njoftim zyrtar në lidhje me zjarret në vend. Ministria në njoftim bën të ditur se në 24 orë janë raportuar 52 zjarre. Nga këto zjarre 46 janë arritur të fiken ndërsa dy janë ende aktive. Më tej bëhet me dije se 4 vatra janë nën monitorim.
Në zonën perëndimore të tunelit të Skërficës mësohet se mbetet aktive një vatër zjarri. Për shkak të terrenit të thepisur dhe bimësisë shumë të dendur nuk është bërë e mundur ndërhyrja. Ditën e sotme vatra e zjarrit po monitorohet nga MZSH e Bashkisë.
“Në fshatin Spatharë, bashkia Skrapar, ku zjarri ka rënë në një sipërfaqe kullote. Në vendngjarje ndodhen forca nga të gjitha strukturat operacionale, që po punojnë për vënien nën kontroll të vatrës. Në monitorim, me qëllim shmangien e riaktivizimit janë vatrat në këto zona: Në Parkun Kombëtar të Prespës, fshati Lajthizë, bashkia Pustec, në fshatin Dishnicë, bashkia Korçë, në fshatin Strelcë, bashkia Maliq, në fshatin Veliq, bashkia Tropojë.
Në operacionet për shuarjen e zjarreve u angazhuan: 52 automjete zjarrfikëse, 722 forca operacionale. Gjithashtu në operacionet e ditës së djeshme morën pjesë dhe 2 helikopterë nga Forcat e Armatosura, që operuan në dy zona. Sipas informacionit të dërguar nga Instituti i Gjeoshkencave, sot priten reshje të dobëta deri lokalisht mesatare në qarkun Shkodër, Kukës, Lezhë dhe Durrës, dhe të dobëta në shumicën e qarqeve të vendit. Për sa u përket zjarreve në pyje sot pritet nivel rreziku “I LARTË” në qarqet Elbasan, Fier, Berat dhe Korçë, ndërsa në qarqet e tjerë pritet nivel rreziku “I MODERUAR”,” thuhet në njoftim.
