IZRAEL- Dy grupe izraelite për të drejtat e njeriut, B’Tselem dhe Mjekët për të Drejtat e Njeriut, thanë të hënën se Izraeli po kryen “gjenocid ” në Rripin e Gazës. Këto dy organizata janë zërat e parë të mëdhenj në shoqërinë izraelite që bëjnë akuzën kundër qeverisë, e cila e ka mohuar kategorikisht atë.
“Asgjë nuk të përgatit për të kuptuar se je pjesë e një shoqërie që po kryen gjenocid. Është një moment thellësisht i dhimbshëm për ne”, tha Yuli Novak, drejtor ekzekutiv i B’Tselem, në një deklaratë të lëshuar së bashku me një konferencë për shtyp në Jerusalem për të prezantuar raportet e OJQ-ve.
“Raporti që po publikojmë sot është një që nuk e imagjinoja kurrë se do të duhej ta prodhonim“, tha Novak.“Populli i Gazës është zhvendosur, bombarduar dhe është zhveshur plotësisht nga njerëzimi dhe të drejtat e tij”, shtoi ai.
Raporti i B’Tselem bazohet në një analizë të dëshmive, statistikave dhe fakteve të politikës izraelite gjatë më shumë se 20 muajve.
“Një shqyrtim i politikës izraelite në Rripin e Gazës dhe pasojave të saj të tmerrshme, si dhe deklaratat e politikanëve të lartë izraelitë dhe zyrtarëve ushtarakë në lidhje me objektivat e sulmit, na çojnë në përfundimin e pamohueshëm se Izraeli po kryen një veprim të koordinuar që synon shkatërrimin e qëllimshëm të shoqërisë palestineze në Rripin e Gazës”, thekson raporti i B’Tselem.
Nga ana e tyre, Mjekët për të Drejtat e Njeriut u përqendruan në “çmontimin e qëllimshëm dhe sistematik të sistemit shëndetësor të Gazës” dhe arritën në përfundimin se operacionet e Izraelit në Gaza “përmbushin kriteret për gjenocid siç përcaktohet në Konventën për Parandalimin dhe Ndëshkimin e Krimit të Gjenocidit, nënshkruese e së cilës është Izraeli”, sipas një deklarate të përbashkët nga dy OJQ-të.
David Mensher, një zëdhënës i qeverisë izraelite, theksoi se Izraeli e hedh poshtë fuqimisht këtë akuzë.
“Nuk ka qëllim (që përbën) bazën për akuzën për gjenocid (…) thjesht nuk ka kuptim që një vend të dërgojë 1.9 ton ndihma, shumica e të cilave janë ushqime, nëse synon të kryejë gjenocid”, tha ai.
Dhe ushtria izraelite i ka hedhur poshtë përfundimet e raporteve si të pabaza, duke theksuar se i përmbahet ligjit ndërkombëtar dhe merr masa të paprecedentë për të siguruar që civilët të mos dëmtohen, ndërsa Hamasi i përdor ata si mburoja njerëzore.
Gjykata Ndërkombëtare Penale ka lëshuar urdhër-arreste për kryeministrin izraelit Benjamin Netanyahu dhe ish-ministrin e Mbrojtjes Yoav Galland pasi ka dyshime se ata kanë kryer krime lufte dhe krime kundër njerëzimit .
Në të njëjtën kohë, Afrika e Jugut i është drejtuar Gjykatës Ndërkombëtare të Drejtësisë duke e akuzuar Izraelin për kryerjen e gjenocidit në Rripin e Gazës.
Lufta në Gaza filloi pas sulmit të paprecedentë të Hamasit ndaj Izraelit më 7 tetor 2023, i cili vrau 1,219 persona – kryesisht civilë – sipas një llogaritjeje të AFP bazuar në të dhënat zyrtare izraelite. Në përgjigje, Izraeli nisi operacione ushtarake në shkallë të gjerë në enklavën palestineze, të cilat deri më tani kanë shkaktuar vdekjen e të paktën 59,920 personave, kryesisht gra dhe fëmijë, sipas të dhënave nga Ministria e Shëndetësisë e Hamasit.
