KSAMIL- Detaje të reja janë zbardhur në lidhje me dhunimin e një pronari hoteli në Ksamil. Mësohet se kjo nuk është hera e parë që ndaj këtij pronari është ushtruar dhunë. Më parë po i njëjti person ka ushtruar dhunë ndaj Albert Pashaj i cili është pronar i “Euro Hotel Ksamil”.
Dhunuesi Agim Taraj është pronar i “Sunset Restorant Ksamil”. Ngjarja ka ndodhur në prani të pushuesve. Rasti i parë i dhunës është publikuar me video ku duket Pashaj i cili sulmohet nga disa persona.
Në një mesazh për JOQ Albania, Pashaj u shpreh se ndodhet në spital pas sulmit. Ai theksoi se edhe pse është bërë kallëzim për ngjarjen e ndodhur disa javë më parë, asnjë masë nuk është marrë nga autoritetet.
“Ky zoti Agim Taraj, bashkë me një grup personash, ka ushtruar dhunë fizike ndaj meje në hotelin tim, në momentin kur klientët ishin duke konsumuar mëngjesin. Kjo është hera e dytë që më dhunon dhe autoritetet nuk kanë marrë asnjë masë. Ndodhem në spital dhe ndjej që jam i braktisur nga shteti.”, tha Pashaj.
Sipas tij, agresioni ka lidhje me një konflikt për plazhin përballë hotelit. Ai pretendon se ka marrë miratim nga AKB për strukturën akomoduese dhe plazhin, por Bashkia Sarandë nuk ka firmosur kontratën me të, duke favorizuar një tjetër subjekt që sipas tij nuk zotëron asnjë hotel apo dokumentacion të rregullt.
